देऊळगांव राजा: चिखली-जालना मार्गावर देऊळगाव राजा नजीक दगडवाडी फाट्याजवळ दुचाकीला ओव्हरटेक करण्याच्या नादाता स्कॉर्पीअेा उलटून झालेल्या अपघातामध्ये चार जण ठार झाले असून चार जण गंभीर जखमी झाले आहेत. हा अपघात १७ एप्रिल रोजी सांयकाळी ६ वाजेच्या सुमारास घडला.
या अपघातामध्ये वाहन चालक योगेश लक्ष्मणराव देशमुख (५०, रा. अंबाशी, ता. चिखली), वसंतराव देविदास देशमुख (४५, रा. अमानी, जि. वाशिम), अशोकराव भीमराव नाईक (६५, रा. सवणा, जि. वाशिम) आणि विलास जयवंतराव देशमुख (७६, रा. अंबाशी, ता. चिखली) हे चौघे ठार झाले आहेत. दरम्यान जखमीमध्ये गोपाळराव आबाराव देशमुख (४३), मीराबाई संजय देशमुख (४०), शालीनीबाई अनंत देशमुख (३४), अक्षरा संदीप देशमुख (१४) असे चार जण जखमी झाले आहेत.
हे सर्व जण एमएच-२८-बीक्यू-०६०६ क्रमांकाच्या स्कॉर्पिअेा गाडीने जालना येथे एका नातेवाईकाच्या लग्नासाठी जात होते. दरम्यान बुधवारी सायंकाळी एका दुचाकी चालकाला अेाव्हर टेक करण्याच्या प्रयत्नात चालक योगेश लक्ष्मणराव देशमुख याचे वाहनावरील नियंत्रण सुटले. त्यानंतर गाडी डिव्हायडरला धडकून उलटली. यामध्ये चार जण ठार तर चार जण जखमी झाले आहेत. चिखली तालुक्यातील खैरव अंबाशी येथून ते जालना येथे जात होते. त्यावेळी दगडवाडी फाट्याजवळ हा अपघात घडला. मृतांपैकी तिघांचा घटनास्थळीच मृत्यू झाला तर गंभीर जखमी अवस्थेतील चालक योगेश लक्ष्मण देशमुख याची प्रकृती चिंताजनक असल्याने त्यास जालना येथे तत्काळ उपचारासाठी हलविण्यात आले.
मात्र उपचारादरम्यान त्यांचा मृत्यू झाला. अपघाताची माहिती मिळताच पोलिस व स्थानिकांनी घटनास्थळी धाव घेत जखमींना रुग्णालयात दाखल केले. अपघातामधील गंभीर जखमींवर डॉ. प्रिती दिवाकर व अक्षय गुट्टे यांनी तत्काळ उपचार सुरू केले.