प्रकल्पात बुडालेल्या तरुणाचा मृतदेह सापडला

खामगाव येथील एकता नगर भागात राहणारे इम्रान हैदरअली, जुगल शर्मा, अन्वर खान, धीरजसिंग रामसिंग ठाकूर, हे चार तरुण १३ सप्टेंबर रोजी देऊळगाव साकर्शा येथील उतावळी प्रकल्प पाहण्यासाठी सायंकाळी ४ वाजेदरम्यान आले होते. यावेळी हे तरुण प्रकल्पाच्या सांडव्यामध्ये उतरले असताना यापैकी धीरजसिंग रामसिंग ठाकूर (२२) या तरुणाचा तोल गेल्याने तो सांडव्याच्या डोहात पडला. यावेळी त्याच्या डोक्याला मार लागल्याने तो बुडाला. यावेळी रात्री उशिरापर्यंत बुडालेल्या युवकाला बाहेर काढण्यासाठी प्रयत्न सुरू होते. मात्र, पावसामुळे शोधकार्यात अडथळा येत असल्याने त्या युवकाचा रात्रभर शोध लागू शकला नाही. मात्र, सकाळी या युवकाचा मृतदेह काढण्यात गावकरी आणि पोलीस प्रशासनाला यश आले. घटनास्थळी जानेफळ पोलीस स्टेशनचे सहायक पोलीस निरीक्षक सावले, बीट जमादार प्रल्हाद टकले, विनोद फुपाटे, पोलीस पाटील गजानन पाचपोर, सरपंच संदीप अल्हाट, तलाठी बालाजी माने या घटनेचा पंचनामा केला आणि मृतदेह उत्तरीय तपासणीसाठी पाठविण्यात आला.