गोडावूनमध्ये साठविलेली तुरीची १४३ पोती लंपास

येथील अडत व्यापारी प्रेमराज प्रभुलाल भाला यांचे कृषी उत्पन्न बाजार समितीमध्ये ‘भाला ट्रेडर्स’ या नावाने अडत दुकान आहे. याद्वारे खरेदी-विक्री केलेला माल साठविण्यासाठी ‘प्रभुजी वेअर हाऊस’ या नावाचे जालना रोडवर त्यांचे गोडावून आहे. यातील चौथ्या क्रमांकाच्या गोडावूनमध्ये अडतमध्ये घेतलेला हरभरा व तूर हा माल गेल्या महिन्यापासून त्यांनी साठवून ठेवला होता. १ क्विंटलची १०७२ पोती यामध्ये ठेवलेली होती. या गोडावूनमधील १४ ऑगस्ट रोजी कामकाज पार पडल्यानंतर १५ व १६ ऑगस्ट रोजी दोन दिवस शासकीय सुटीमुळे गोडावून बंद होते. याच काळात अज्ञात चोरट्यांनी गोडावूनचे कुलूप तोंडून व आत प्रवेश करून १ क्विंटल तुरीने भरलेली एकूण १४३ (किंमत सुमारे ८ लाख ८६ हजार ६०० रुपये) पोती लंपास केली आहेत. १७ ऑगस्ट रोजी प्रेमराज भाला हे सकाळी १० वाजता वेअर हाऊसला चाब्या घेऊन पाहणीसाठी गेले असता, ही बाब उघडकीस आली. याप्रकरणी प्रेमराज भाला यांनी चिखली पोलिसांत तक्रार दाखल केली आहे.