सन २०२१-२२ करिता अर्ज स्‍वीकृती प्रक्रिया सुरू करण्‍यात आली असून यात ज्या शेतक-यांनी सन २०२०-२१ मध्‍ये महाडीबीटी पोर्टलवर अर्ज केला आहे परंतु त्यांची कोणत्‍याही योजनेसाठी निवड झाली नाही ते शेतकरी त्‍यांच्‍या अर्जातील बाबींमध्‍ये बदल करू शकणार आहेत. असे अर्ज सन २०२१-२२ करिता ग्राह्य धरले जातील.त्‍याकरीता त्‍यांच्‍याकडून पुन्हा शुल्‍क आकारले जाणार नाही. सन २०२१-२२ करिता वरील अर्जातील ज्या बाबींकरिता अर्ज केलेला नाही त्या बाबींचा अर्जामध्‍ये विनाशुल्‍क समावेश करता येईल.
महाडीटीबी पोर्टलवर "शेतकरी योजना" या सदराखाली शेतकऱ्यांच्‍या सोयीकरिता सर्व योजनांचा लाभ एकाच अर्जाव्‍दारे देण्‍याच्‍या दृष्‍टीने अर्ज करण्‍यापासून ते प्रत्‍यक्ष लाभ मिळेपर्यंत एकात्मिक संगणकीय प्रणाली वि‍कसित केली असून या प्रणालीव्‍दारे शेतकऱ्यांना त्‍यांच्‍या पसंतीच्‍या बाबींच्‍या निवडीचे स्‍वातंत्र देण्‍यात आले आहे. शेतकऱ्यांनी शेती निगडीत विविध बाबींकरिता अर्ज करावयाचा आहे. "वैयक्तिक लाभार्थी "म्हणून नोंदणी करु इच्छिणाऱ्या सर्व शेतकऱ्यांना त्यांचा आधार क्रमांक सदर संकेतस्थळावर प्रमाणित करुन घ्यावा लागेल. ज्या वापरकर्त्यांकडे आधार क्रमांक नसेल त्यांनी प्रथम आधार नोंदणी केंद्राकडे जाऊन त्यांची नोंदणी करावी व सदर नोंदणी क्रमांक महा-डीबीटी पोर्टलमध्ये नमूद करुन त्यांना योजनांसाठी अर्ज करता येईल, असे सिंदखेड राजा तालुका कृषी अधिकारी वसंतराव राठोड यांनी सांगितले.