लोकमत न्यूज नेटवर्क बुलडाणा : जिल्ह्यातील अन्नसुरक्षा योजनेंतर्गत अंत्योदय लाभार्थ्यांची संख्या ६६ हजार ४९६ असून, त्यांच्यासाठी सप्टेंबर महिन्यात गहू १३ हजार ९६0 व तांदूळ ९ हजार ३१0 क्विंटल पुरवठा करण्यात आला आहे; मात्र जिल्ह्यात राशनचा माल काळा बाजारात विक्री होण्याचे प्रमाण वाढल्याने अनेक लाभार्थ्यांना या धान्याचा लाभ मिळत नाही. त्यामुळे जिल्ह्यातील स्वस्त धान्य दुकानांची तपासणी करून तत्काळ अहवाल सादर करण्याचे आदेश जिल्हाधिकारी डॉ.चंद्रकांत पुलकुंडवार यांनी दिले आहेत.जिल्ह्यात शासकीय अन्न धान्याचा काळाबाजार वाढत असल्याने गोरगरिबांना राशनच्या मालापासून वंचित रहावे लागत आहे. राष्ट्रीय अन्न सुरक्षा अधिनियम, २0१३ अंतर्गत अंत्योदय लाभार्थ्यांसाठी दरमहा हजारो क्विंटल धान्याचा पुरवठा स्वस्त धान्य दुकानदारांना करण्यात येतो. जिल्ह्यात अन्नसुरक्षा योजनेंतर्गत अंत्योदय लाभार्थ्यांची संख्या ६६ हजार ४९६ आहे. अंत्योदय लाभार्थ्यांसाठी सप्टेंबर महिन्याचे धान्य गहू व तांदूळ धान्याची शासकीय गोदामात वाहतूक करण्याचे आदेश या महिन्याच्या सुरूवातीलाच देण्यात आले होते. त्यासाठी भारतीय अन्न महामंडळाच्या ब्लॅक स्टोन लॉजिस्टीक्स प्रा. लि. खामगाव यांच्या गोदामातून १५ सप्टेंबरपर्यंत या धान्याची उचल करण्यात आली. त्यामध्ये बुलडाणा तालुक्यासाठी गहू १ हजार ६६७ क्विंटल व तांदूळ ९00 क्विंटल, चिखली गहू ५५६ क्विंटल व तांदूळ ९00 क्विंटल, अमडापूर गहू ३३८ क्विंटल व तांदूळ १00 क्विंटल, देऊळगाव राजा गहू ७00 व तांदूळ ७00, मेहकर गहू ७७६ व तांदूळ १ हजार क्विंटल, डोणगाव गहू ३३८ व तांदूळ १00 क्विंटल, लोणार गहू १ हजार ६७८ व तांदूळ १ हजार २00 क्विंटल, सिंदखेड राजा गहू ७७२ व तांदूळ ८00, साखरखेर्डा गहू ६१४ व तांदूळ २५0 क्विंटल, मलकापूर गहू १ हजार ११७ व तांदूळ ५00 क्विंटल, मोताळा गहू १ हजार ४१४ व तांदूळ ६00 क्विंटल, नांदूरा गहू १ हजार १४८ व तांदूळ ६00 क्विंटल, खामगाव गहू १ हजार २0४ व तांदूळ ३५0 क्विंटल, शेगाव गहू ५६३ व तांदूळ २५0 क्विंटल, जळगाव जामोद गहू ३४१ व तांदूळ ४५0 क्विंटल, संग्रामपूर गहू ७३८ व तांदूळ ६१0 क्विंटल पुरवठा करण्यात आला. जिल्ह्यात अन्नसुरक्षा योजनेंतर्गत अंत्योदय लाभार्थ्यांसाठी एकूण गहू १३ हजार ९६0 व तांदूळ ९ हजार ३१0 क्विंटल पुरवठा करण्यात आला आहे. धान्याचा वाढता काळाबाजार रोखण्यासाठी जिल्ह्यातील स्वस्त धान्य दुकानांची तपासणी केल्यानंतर तत्काळ अहवाल सादर करण्याचे आदेश जिल्हाधिकारी पुलकुंडवार यांनी दिले आहेत.
मध्येच गायब होणार्‍या मालाची चौकशी गरजेची शासकीय धान्य गोदामातून उचल करण्यात आलेले धान्य मध्येच गायब होत असल्याचे प्रकार वाढले आहेत. ज्या ठिकाणी धान्याचा काळाबाजार उघड झाला, त्याची थातुरमातूर चौकशी करून पुन्हा प्रकरण फाइलबंद होते; मात्र त्यानंतर पुन्हा पुढच्या महिन्यात शासकीय गोदामातून उचल झालेले धान्य स्वस्त धान्य दुकानांपर्यंत जाण्याआधीच कमी होते. त्यामुळे मध्येच गायब होणार्‍या मालाची चौकशी लावणे गरजेचे आहे.