खामगाव : विचित्र रस्ते अपघातात मंगळवारी जखमी झालेल्या युवकाचा बुधवारी खामगाव येथील एका खासगी रूग्णालयात मृत्यू झाला. त्याच्या मृत्यूने परिवारावर दु:खाचा डोंगर कोसळला आहे. तर, याच अपघातात गंभीर जखमी झालेल्या एका गर्भवती महिलेवर रूग्णालयात उपचार सुरू आहेत.
खामगाव-शेगाव रोडवरील कनारखेड फाट्यानजीक भरधाव कारने एका दुचाकीला मंगळवारी जबर धडक दिली. यानंतर ही दुचाकी दुसऱ्या दुचाकीवर आदळल्याने झालेल्या अपघातात खामगाव येथील सौरभ प्रकाश अल्हाट(२८) रा.सावजी हा युवक गंभीर जखमी झाला. तर गर्भवती असलेली नेहा सोळंके (रा.शेलूद ता.चिखली) ही महिलादेखील गंभीर जखमी झाली होती. या अपघातात नेहा सोळंके यांचे पतीही किरकोळ जखमी झाले.
या तिहेरी अपघातानंतर त्यांना येथील सामान्य रुग्णालयात भरती करण्यात आले होते. मात्र सौरभ याची प्रकृती गंभीर असल्याने त्याला येथील एका खासगी रुग्णालयात भरती करण्यात आले होते. तेथे त्याच्यावर शस्त्रक्रियादेखील झाली. दरम्यान, बुधवारी दुपारी सौरभ अल्हाट याचा उपचारादरम्यान मृत्यू झाला. घटनेनंतर अपघातास कारणीभूत असलेला कारचालक कारसह घटनास्थळावरून फरार झाला आहे.