मलकापूर (बुलढाणा) : तालुक्यातील मौजे बेलाड फाट्यावरून दोन अल्पवयीन तरुणींना फुस लावून पळविल्याची घटना शनिवारी दुपारी घडली. या घटनेत पीडित मुलीच्या आईने दिलेल्या फिर्यादीवरून शहर पोलिसांनी अज्ञात आरोपींविरुद्ध उशिरा रात्री विविध कलमान्वये गुन्हा दाखल केला आहे.
राष्ट्रीय महामार्गानजीक बेलाड फाट्यावर काही लोक वस्ती करून निवासाला आहेत. त्याच वस्तीतील दोन अल्पवयीन तरुणींना फुस लावून पळविल्याची घटना शनिवारी उघडकीस आली. पीडित मुलीच्या आईने शहर पोलिसात फिर्याद दाखल केली. त्यामध्ये त्यांच्या मुलीने दिलेल्या माहितीनुसार त्यांची मुलगी व आणखी एक मुलगी अशा दोन १६ वर्षीय मुली किराणा दुकानात जाऊन येतो, असे सांगून शनिवारी दुपारी २.३० च्या सुमारास बाहेर पडल्या होत्या. सायंकाळपर्यंत त्या परतल्याच नाहीत. त्यांचा नातेवाईक व गावात शोध घेण्यात आला.
सगळीकडे विचारपूस करण्यात आली. मात्र, त्या मिळून आल्या नाहीत. अज्ञात इसमाने अज्ञात कारणासाठी पालकांच्या रखवालीतून त्या दोघींना फुस लावून पळविल्याचे म्हटले. शहर पोलिसांनी अज्ञात आरोपींविरुद्ध भारतीय न्याय संहितेच्या कलम १३७(२) प्रमाणे गुन्हा दाखल केला. तपास पोलिस निरीक्षक गणेश गिरी यांच्या आदेशावरून पोहेकाँ सचिन पाटील करीत आहेत.