ECIL Recruitment: गेल्या अनेक महिन्यांपासून खासगी तसेच सरकारी अनेक विभागात मोठ्या प्रमाणात भरती प्रक्रिया राबवली जात आहे. कोरोनानंतर बहुतांश जग पूर्वपदावर आलेले असताना पुन्हा एकदा नवीन सुरुवात जोमाने व्हावी, यासाठी अनेकविध क्षेत्रातील विविध कंपन्या नोकरभरती करताना पाहायला मिळत आहे. इलेक्ट्रॉनिक कॉर्पोरेशन ऑफ इंडिया लिमिटेड (Electronic Corporation Of India Limited, ECIL) मध्ये विविध पदांची भरती केली जाणार आहे. या भरती प्रक्रियेअंतर्गत एकूण २८४ पदे भरली जातील.
यासाठी अधिकृत वेबसाइटवर नोटिफिकेशन प्रसिद्ध करण्यात आले असून पदासाठी लागणारी शैक्षणिक अर्हता, वयोमर्यादा, अनुभव, अर्जाची शेवटची तारीख यांचा सविस्तर तपशील देण्यात आला आहे. इलेक्ट्रॉनिक कॉर्पोरेशन ऑफ इंडिया लिमिटेड अंतर्गत अनेक ट्रेड अप्रेंटिस पदे भरली जाणार आहेत. या पदांसाठी अर्ज करणाऱ्या उमेदवाराकडे मान्यताप्राप्त शिक्षणसंस्थेतून दहावी आणि आयटीआय उत्तीर्ण असणे आवश्यक आहे.
अर्ज करण्यासाठी शेवटची तारीख काय?
अर्ज करणाऱ्या उमेदवारांचे वय १८ ते २५ वर्षादरम्यान असावे. ओबीसी उमेदवारांसाठी कमाल वयोमर्यादा २८ वर्षे तर एससी, एसटी उमेदवारांसाठी ३० वर्षे इतकी वयोमर्यादा आहे. पदभरतीसाठी अर्ज करताना उमेदवारांनी रेझ्युमे, दहावी, बारावी आणि शैक्षणिक प्रमाणपत्रं, शाळा सोडल्याचा दाखला, जातीचा दाखला (मागासवर्गीय उमेदवारांसाठी), ओळखपत्र (आधारकार्ड, लायसन्स) आणि पासपोर्ट साईझ फोटो हे दस्तावेज सोबत जोडणे आवश्यक आहे. ८ ऑगस्ट ही अर्ज करण्याची शेवटची तारीख आहे.
दरम्यान, या पदासाठी आरक्षित वर्गातील उमेदवारांना पदभरती आणि वयोमर्यादेमध्ये सरकारी नियमानुसार सवलत देण्यात येणार आहे. याचा सविस्तर तपशील नोटिफिकेशनमध्ये देण्यात आला आहे. अर्ज करण्यापूर्वी उमेदवारांनी अधिकृत संकेतस्थळावरील नोटिफिकेशन काळजीपूर्वक वाचावे, असे सांगितले जात आहे.