३५ वर्षांनंतर सावरगावात भरला आठवडी बाजार

सावरगाव येथे मागील जवळपास ३५ वर्षांअगोदर आठवडी बाजार भरत होता. मात्र, काही कारणास्तव तो बंद करण्यात आला. मागील पाच वर्षांपासून सावरगाव येथे आठवडी बाजार भरविण्यात यावा, अशी नागरिकांची मागणी होती. याबाबत ''लोकमत''ने अनेकदा वृत्त प्रकाशित केले होते. लोकांच्या मागणीनुसार ग्रामपंचायतीने जिल्हा परिषदेकडे प्रस्ताव पाठविला होता. मात्र, मागील चार वर्षांपासून हा विषय प्रलंबित ठेवण्यात आला होता. दरम्यान, जिल्हा परिषद सदस्य नयना गेडाम यासाठी सतत प्रयत्नशील राहिल्या. त्यांचे प्रयत्न आणि ग्रामपंचायतीचे सहकार्य यामुळे सदर प्रस्तावाला एकदाची मंजुरी मिळाली आणि आठवडी बाजार मंगळवारी सुरू करण्यात आला. आता दर मंगळवारी सावरगाव येथे आठवडी बाजार भरणार असून, या आठवडी बाजाराचा लाभ नागरिकांनी घ्यावा, असे आवाहन ग्रामपंचायतीने केले आहे.