आक्सापूर : पंचायत समिती, गोंडपिपरीच्या सदस्य भूमी पिपरे यांनी काही दिवसांपूर्वीच पंचायत समिती सभागृहात रक्षाबंधनाचा भावनिक सोहळा घेतला. यावेळी आशीर्वाद स्वरूपात काही राशी जमा झाली. यात त्यांनी स्वतःच्या वर्षभरातील मानधनाची रक्कम जमा केली आणि गोळा झालेल्या एकत्रित रकमेतून आपल्या करंजी पंचायत समिती क्षेत्रातील शाळांमधील गरीब-गरजू विद्यार्थ्यांना शैक्षणिक साहित्याचे वाटप केले आहे.
गोंडपिपरी तालुक्यातील करंजी गणाच्या पंचायत समिती सदस्य भूमी पिपरे यांनी काही दिवसांपूर्वीच पंचायत समिती सभागृहात रक्षाबंधनाचा भावनिक सोहळा घेतला. यावेळी पंचायत समिती कार्यालयातील सर्व विभागांचे अधिकारी, कर्मचाऱ्यांची उपस्थिती होती. त्यांना राखी बांधत संकटकाळात भगिनींची ‘रक्षा’ करण्याचे आवाहन बंधूरायांना केले होते. या भावनिक सोहळ्यात उपस्थित अधिकारी, कर्मचाऱ्यांकडून आशीर्वाद स्वरूपात त्यांना दिलेली काही रक्कम जमा झाली. यात भर म्हणून पंचायत समिती सदस्य असलेल्या भूमी पिपरे यांनी आपल्या वर्षभराच्या मानधनाची रक्कम टाकली आणि या एकत्रित रकमेतून करंजी, आक्सापूर, चेकपेल्लूर, चेकबेरडी, वडकूली, वढोली आणि चेकलिखितवाडा या शाळांमधील तब्बल ७२ विद्यार्थ्यांना साहित्याचे वितरण केले. यावेळी पंचायत समितीचे संवर्ग विकास अधिकारी शेषराव भुलकुंडे, गटशिक्षणाधिकारी धनराज आवारी, शिक्षण विस्तार अधिकारी नामदेव राऊत, केंद्रप्रमुख वंदना बोधे, पशुधन पर्यवेक्षक सीमा गडदे आदी उपस्थित होते.