साडेपाच लाखाचा मुद्देमाल ‘त्या’ घरफोडीत लंपास

कळंब : तालुक्यातील हवरगाव येथील घरफोडीत तब्बल ५ लाख ३९ हजार रूपयाचा मुद्देमाल चोरट्यांनी लंपास केल्याचे पुरवणी जबाबातून समोर आले आहे़ या घटनेत साडेपाच लाखाचा मुद्देमाल लंपास झाल्याने कापड दुकानदारही हैराण झाले असून, पोलिसांनी तत्काळ चोरीचा तपास लावावा, अशी मागणी होत आहे़तालुक्यातील लता वाघमारे, ज्ञानोबा कोल्हे यांच्या घरी २६ आॅक्टोबर रोजी मध्यरात्री चोरट्यांनी घरफोडी करून रोख रक्कमेसह मुद्देमाल लंपास केला होता़ या प्रकरणी प्रारंभी कळंब पोलिस ठाण्यात लता वाघमारे यांच्या फिर्यादीवरून गुन्हा दाखल करण्यात आला होता़ मात्र, कापड व्यवसायिक कोल्हे यांच्याकडील किती मुद्देमाल गेला याचे गणित त्यावेळी न लागल्याने त्यांच्या मुद्देमालाबाबतचा आकडा केवळ चर्चेत होता़ त्यानंतर कळंब पोलिसांनी केलेली चौकशी व कोल्हे यांनी केलेल्या पाहणीतून कपाटातील रोख १५ हजार, बनारशी शालू, इरकल, सुरत साडी, शुटिंग, शर्टिंग व रेडीमेड माल असा एकूण ५ लाख, ३९ हजार रूपयांचा मुद्देमाल चोरट्यांनी लंपास केल्याचा प्रकार समोर आला आहे़ याबाबत पुरवणी जबाब नोंदविण्यात आला असून, कळंब पोलिसात याची नोंद करण्यात आली आहे़ (वार्ताहर)