छत्रपती संभाजीनगर : मानलेल्या बहिणीला दोन हजार रूपये देण्यासाठी पाठविलेल्या मित्रानेच इतर दोन सहकाऱ्यासह आळीपाळीने सामुहिक अत्याचार केल्याची घटना शुक्रवारी (दि.५) रात्री ९ वाजेच्या सुमारास केंब्रिज परिसरात घडली. या प्रकरणी एमआयडीसी सिडको पोलिसांनी गुन्हा दाखल होताच आवघ्या पाच तासात मुख्य आरोपीला बेड्या ठोकल्या. उर्वरित दोन आरोपी फरार असून, त्याच्या शोधात पथके पाठविण्यात आल्याची माहिती निरीक्षक गौतम पातारे यांनी दिली.
पोलिसांनी अटक केलेल्या मुख्य आरोपीचे एकनाथ नामदेव केदारे (२५, रा. आडगाव) असे नाव आहे. पीडितेच्या फिर्यादीनुसार त्या पती व दोन मुलांसह राहतात. ५ एप्रिल रोजी केस सुरू असल्यामुळे दुपारपासून पतीसह कोर्टातच होत्या. सायंकाळी ६ वाजता घरी पोहचल्यानंतर त्यांनी मानलेल्या भावाला फोन करून २ हजार रुपयांची मागणी केली. तेव्हा त्याने माझा मित्र एकनाथला २ हजार रुपये घेऊन तुझ्याकडे पाठवितो असे त्याने सांगितले.
पीडितेच्या पतीला उपवास असल्यामुळे दोघेजण दुचाकीवर खरेदीसाठी किराणा दुकानात आले. तेव्हा पीडितेला मुख्य आरोपी एकनाथने फोन करून २ हजार रुपये देण्यासाठी पिसादेवी चौकात थोड्या वेळेत पोहचत असल्याचे सांगितले. एकनाथ पिसादेवी चौकात आल्यानंतर त्याने केंब्रिज चौकाजवळ एक माणुस थांबला असून, त्याच्याकडून पैसे घेऊन तुम्हाला देतो, तुम्ही माझ्यासोबत चला असे पीडितेला सांगितले. त्यानुसार पीडिता एकनाथच्या दुचाकीवर बसून केंब्रिज चौकाच्या परिसरात पोहचली.
एकनाथने सुर्या हॉटेलसमोर दुचाकी थांबवली. त्याठिकाणी आणखी दोघेजण होते. तिघांनी मिळून पीडितेला जवळच्या मोठ्या झाडांमध्ये ओढत नेले. त्याठिकाणी रुमालाने पाय बांधुन तिघांनी आळीपाळीने बलात्कार केला. आरडाओरड करू नये म्हणून तोंड दाबुन ठेवले. अत्याचार केल्यानंतर तिघांनी पीडितेच्या गळ्यातील मंगळसूत्र, मोबाईल असा एकुण ३० हजार रुपयांचा मुद्देमालही लुटून नेल्याचे फिर्यादीत म्हटले आहे.
दुसऱ्या एकाने पिसादेवी चौकात सोडले
पीडितेवर अत्याचार केल्यानंतर तिघेही निघुन गेले. पीडिता रडतच रस्त्यावर आल्यानंतर नागरिकांनी विचारपुस केली. मात्र, कोणीही मदतीसाठी पुढे आला नाही. पीडिता चालत कचऱ्याच्या कारखान्याजवळ आली. तेथे थोडावेळ थांबल्यानंतर एका दुचाकीवाल्यास मदत मागितल्यानंतर त्याने पिसादेवी चौकात आणून सोडले. तेथून पीडिता घरी पोहचली. पतीला घटनाक्रम सांगितल्यानंतर दुसऱ्या दिवशी ठाण्यात गुन्हा नोंदवला. अधिक तपास सहायक निरीक्षक मनिषा हिवराळे करीत आहेत.