औरंगाबाद : जुन्या वादात एका तरुणाला भोसकल्याची घटना ६ सप्टेंबर रोजी रात्री साडेबाराच्या सुमारास लक्ष्मीनगर, प्रज्ञानगर भागात घडली. याप्रकरणी छावणी पोलीस ठाण्यात प्राणघातक हल्ल्याचा गुन्हा नोंदविण्यात आला असून, आरोपीला अटक केली आहे. न्यायालयाने आरोपीला १० ऑक्टोबरपर्यंत पोलीस कोठडी दिली आहे.
हेमंत गंगावणे (रा. अशोकनगर, लक्ष्मी कॉलनी) याने दिलेल्या फिर्यादीनुसार, आरोपी किरण सुनील साळवे (रा. मिलकॉर्नर, कोतवालपुरा) याने फिर्यादीचा मावस भाऊ अतुल रमेश लोखंडे यास भोसकले. ५ ऑक्टोबर रोजी सायंकाळी साडेपाचच्या सुमारास मित्रांनी दुर्गा देवीचे कायगाव येथे गोदावरी नदीत विसर्जन केले. त्यानंतर रात्री ११ च्या सुमारास लक्ष्मी कॉलनी येथे परतले. त्यानंतर फिर्यादीसह अमोल बोर्डे, उमेश महिरे आणि जखमी अतुल लोखंडे हे चारचाकी गाडीतून विद्यापीठ परिसरातील लेणीकडे फिरण्यासाठी गेले होते. तेथून साडेबाराच्या सुमारास परत आल्यानंतर सर्वजण प्रज्ञानगर येथील शंकराच्या मंदिराच्या बाजूच्या मोकळ्या जागेत गप्पा मारीत बसले. तेव्हा त्याठिकाणी आरोपी किरण साळवे हा आला. ‘तू परवा माझ्या सोबत का भांडण केले,’ असे म्हणून त्याने अतुल लोखंडे यास शिवीगाळ केली. त्याच वेळी त्याने हातातील चाकूने अतुलच्या पोटात उजव्या बाजूला दोन वार करून पळ काढला.
गंभीर जखमी झालेल्या अतुलला मित्रांनी घाटी रुग्णालयात दाखल केले. त्याठिकाणी त्याच्यावर उपचार सुरू आहेत. दुसऱ्या दिवशी सकाळी प्राणघातक हल्ल्याचा गुन्हा नोंदविण्यात आला. तपास अधिकारी सहायक निरीक्षक पांडुरंग भागिले यांनी आरोपीस अटक केली. आरोपीला न्यायालयात हजर केल्यानंतर १० ऑक्टोबरपर्यंत पोलीस काेठडी मंजूर करण्यात आली आहे.