औरंगाबाद : प्रेमविवाह लपवून कुटुंबीयांच्या सांगण्यानुसार दुसऱ्यांदा बोहल्यावर चढण्याच्या प्रयत्नांत असलेल्या नवरदेवाने बिंग फोडणाऱ्या विवाहितेचाच विनयभंग केला. तिने दिलेल्या तक्रारीवरून छावणी पोलीस ठाण्यात गुन्हा नोंदविण्यात आला.
पोलीस निरीक्षक शरद इंगळे यांनी सांगितले की, विशाल कैलास चव्हाण कोठेकर (रा. कोठा, ता. मंठा, जि. जालना) असे आरोपीचे नाव आहे. तहसील कार्यालयातील लिपिक पती व मुलासह तक्रारदार महिला पडेगाव भागात राहते. तिच्या शाळकरी मैत्रिणीचा प्रेमविवाह दूरचा नातेवाईक विशाल सोबत लपून झाला होता. तरीही विशालने दुसरे लग्न करण्याचा निर्णय घेतला. हे समजल्यावर विशालच्या पत्नीने मैत्रिणीला फोन करून त्याला दुसरे लग्न करू देऊ नका, अशी गळ घातली. त्यानुसार विवाहितेने विशालच्या नातेवाइकांना पहिल्या लग्नाची माहिती दिली. हे प्रकरण समजल्याने त्याचे दुसरे लग्न मोडले.
पडेगावातील विवाहिताच याला जबाबदार असल्याचा गैरसमज करून घेत त्याने २५ सप्टेंबरला तिचे घर गाठून शिवीगाळ केली. त्यानंतरही तो विवाहितेच्या पतीच्या मोबाईलवरून शिवीगाळ करीत होता. त्याने गुरुवारी (दि. २) दुपारी पडेगावात येऊन तिचा विनयभंग केला. गळ्यातील दोन तोळ्यांचे सोन्याचे मंगळसूत्रही हिसकावून घेतले. कोणाला काही सांगितल्यास पती व मुलास जिवे मारण्याची धमकी विशालने दिल्याचे विवाहितेने फिर्यादीत म्हटले आहे. सहायक निरीक्षक पांडुरंग भागिले तपास करीत आहेत.