औरंगाबाद : ऑनलाइन मागविलेल्या ४९ धारदार कुकरी, बाहुबली तलवारींचा साठा बायजीपुरा परिसरातून पुंडलिकनगर आणि जिन्सी पोलिसांनी रविवारी सकाळी जप्त केला. या प्रकरणात पोलिसांनी इरफान खान आयुब खान ऊर्फ दानिश याला अटक केली आहे. त्याला न्यायालयात हजर केले असता न्यायालयाने सहा दिवसांची पोलीस कोठडी सुनावली आहे. या प्रकरणाची पूर्ण चौकशी करून तलवार विकणारे तसेच पुरवठा करणाऱ्यांविरोधात कठोर कारवाई करण्यात येणार असल्याचे पोलीस उपायुक्त दीपक गिर्हे यांनी सांगितले.
इरफान खान सुरुवातीला तलवारी ऑनलाइन मागवून त्या लग्न व इतर कार्यक्रमात भाडेतत्वावर देत होता. त्याने तो विक्रीचा व्यवसाय सुरू केला, आणि त्यातून चांगला नफा होत असल्यामुळे त्याने मोठी ऑर्डर कुरिअर कंपनीला दिली. त्याने कुरिअरने मागविलेला शस्त्रसाठा विक्रीसाठी मागविला की अन्य कारणांसाठी याचा तपास पोलीस करीत आहेत. त्याच्यासोबत अजून कोण सहभागी आहेत का या दृष्टीनेही पोलिसांनी तपास सुरु केला आहे. महानगरपालिका निवडणुकीच्या पार्श्वभूमीवर हा शस्त्रसाठा मागविण्यात आला का, या प्रश्नावर उपायुक्त गिर्हे म्हणाले की, सध्या इरफानची सखोल चौकशी सुरू असून, कुरिअरच्या माध्यमातून ऑनलाइन मागविलेला शस्त्रसाठा त्याच्या घरातून जप्त करण्यात आला आहे. कुरिअर कंपनीच्या ज्या वाहनातून शस्त्र मागविले ते वाहन पुंडलिक नगर पोलिसांनी जप्त केेले आहे. बायजीपुरा परिसरातील त्याच्या घरातून ४९ तलवारी व इतर अन्य शस्त्र जप्त केले आहे. शस्त्र पाठविणाऱ्यांसह खरेदी करणाऱ्यांपर्यंत सर्वांची चौकशी केली जाणार आहे, असे उपायुक्त गिर्हे यांनी सांगितले. यावेळी सहाय्यक पोलीस निरीक्षक घनश्याम सोनवणे व पोलीस निरीक्षक व्यंकटेश केंद्रे उपस्थित होते.
विशेष शाखेच्या पथकाचीही मदत
पोलीस उपनिरीक्षक गोकुळ ठाकूर, शेख सरवर, दत्ता शेळके, सहायक फौजदार अयुब पठाण, संपत राठोड, हारुण शेख, भाऊसाहेब जगताप, गनी शेख, बाळू थाेरात, सुनील जाधव , संजय गावडे, इरफान खान, बाळाराम चौरे, अजय कांबळे, दीपक जाधव, मांटे, प्रवीण गुळे, रवी जाधव, रमेश सांगळे या विशेष शाखेच्या पथकानेही कारवाईत सहभाग घेतला.
या शस्त्र साठ्याचा समावेश
पोलिसांनी कारवाईत ३६ तलवारी, ६ कुकरी , २ गुप्ती , ५ बाहुबली तलवारींचा शस्त्र साठा जप्त केला आहे.