ऑनलाइन लोकमत
औरंगाबाद, दि. 6 - औरंगाबाद विभाग शिक्षक मतदार संघाच्‍या निवडणूक मतमोजणी प्रक्रियेस सकाळी 8 वाजता प्रारंभ झाला आहे. निवडणूक निरीक्षक नरेंद्र पोयाम, निवडणूक निर्णय अधिकारी तथा विभागीय आयुक्‍त डॉ. पुरुषोत्‍तम भापकर यांच्‍या मार्गदर्शनाखाली मतमोजणीला सुरुवात झाली आहे.
कलाग्राम येथील मराठवाडा रिअलेटर्स येथे होत असलेल्‍या या मतमोजणीच्‍या प्रारंभी स्‍ट्रॉंग रुमचे उमेदवार, निवडणूक निर्णय अधिकारी व निवडणूक निरीक्षक यांच्‍या समक्ष सील उघडण्‍यात आले. त्‍यानंतर सहायक निवडणूक निर्णय अधिकारी यांच्‍या देखरेखीखाली व निवडणूक निर्णय अधिकारी यांच्‍या मार्गदर्शनाखाली मतपेट्या सर्व टेबलवर उपलब्‍ध करुन देण्‍यात आल्‍या. त्‍यानंतर मतमोजणी प्रक्रियेस सुरुवात झाली.
पहिल्या पसंती क्रमाकांची मते मोजण्यासाठी किमान 5 तास लागतील, असा अंदाज निवडणूक निर्णय अधिकारी डॉ. पुरूषोत्तम भापकर यांनी व्यक्त केला.