फेक फेसबुक अकाऊंटवरून प्रियांका गांधी, अनिल देशमुख यांच्याविरोधात अश्लील पोस्ट करणाऱ्या आरोपीला अटक 

Crime News : तो मूळचा उस्मानाबाद जिल्ह्याचा रहिवासी असून तो पुण्यात चिखली येथे एका खासगी कंपनीत नोकरी करत आहे. 

ठळक मुद्देपुण्याच्या श्रिशैल शरणप्पा खज्जे याने फेसबुकवर या अश्लील पोस्ट केल्याचा आरोप असून, मुंबई पोलिसांनी त्याला बेड्या ठोकल्या आहेत.

काँग्रेस पक्षाच्या सरचिटणीस प्रियांका गांधी आणि महाराष्ट्र राज्याचे गृहमंत्री अनिल देशमुख यांच्या विरोधात सोशल मीडियावर अश्लील पोस्ट करणाऱ्याच्या मुसक्या पोलिसांनी आवळल्या आहेत. पुण्याच्या श्रिशैल शरणप्पा खज्जे याने फेसबुकवर या अश्लील पोस्ट केल्याचा आरोप असून, मुंबई पोलिसांनी त्याला बेड्या ठोकल्या आहेत. तो मूळचा उस्मानाबाद जिल्ह्याचा रहिवासी असून तो पुण्यात चिखली येथे एका खासगी कंपनीत नोकरी करत आहे. मुंबई सायबर सेलच्या सूत्रांनी दिलेल्या माहितीनुसार, आरोपी श्रीशैल याने आप्पा केसर जावळगेकर या नावाने फेसबुकवर फेक अकाऊंट तयार केले. याच अकाऊंटवरुन त्याने प्रियांका गांधी आणि अनिल देशमुख यांच्याविरोधात अश्लील पोस्ट केली. याबाबत तक्रार आल्यानंतर मुंबई गुन्हे शाखेच्या युनिट ६ ने ९ ऑक्टोबरला गुन्हा दाखल केला. नंतर गुन्ह्याचा तपास सुरु केला. तपासात गुन्हे शाखेच्या युनीट ६ ला श्रीशैलच्या फेक फेसबुक अकाऊंटची माहिती मिळाली आणि पोलिसांनी आरोपीला अटक केली. दरम्यान, मुंबई गुन्हे शाखेकडून याबाबत अधिक तपास सुरु आहे. मुंबई पोलीस आरोपी श्रीशैलची कसून चौकशी करत आहेत. त्याने याअगोदर देखील काही आक्षेपार्ह पोस्ट केलेल्या आहेत का? तसेच आरोपीला काही राजकीय पार्श्वभूमी आहे का? ती असेल तर, यामागे नेमका कुणाचा हात असेल? या सर्व गोष्टींचा सखोल तपास मुंबई पोलिसांकडून केला जात आहे. तसेच अश्लील पोस्ट करण्यामागे त्याचा नेमका काय उद्देश असावा, याची देखील चौकशी मुंबई पोलीस करत आहे.