सांगली : बलात्काराचा गुन्हा दाखल करण्याची धमकी देवून एका व्यवसायिकाकडे दहा लाखाच्या खंडणीची मागणी केल्याचा प्रकार उघडकीस आला आहे. याप्रकरणी शहर पोलिसांनी एका महिलेसह दोघांविरुद्ध गुन्हा दाखल केला आहे. संशयित दोघेही विश्रामबाग परिसरात रहात असून त्या दोघांनी आतापर्यंत्त १ लाख ३७ हजार रुपयांची खंडणी घेतल्याची तक्रार व्यवसायिकाने पोलिसांत दिली आहे.
पोलिसांनी दिलेल्या माहितीनुसार , पिडीत तरुण व्यावसायिक आहे. त्याचे आणि संशयित महिलेचे मैत्री संबध होते. परंतु २०२१ पासून पिडीत तरुणाने त्या महिलेकडे जाणे येणे कमी केले. त्याने तिला आपले लग्न झाले असल्याने तुझ्याकडे जाणे येणे कमी केल्याचेही सांगितले. याच कारणावरुन तुझ्यविरुध्द बलात्काराचा गुन्हा दाखल करू, अशी धमकी तिने आणि तिच्या बरोबरच्या एकाने दिली. गुन्हा दाखल करायचा नसेल तर दहा लाख रुपयांची खंडणी द्यावी लागेल, असे बजावून त्या दोघांनी आतापर्यंत्त पिडीत तरुणाकडून स्टेशन चौक आणि राजवाडा चौक परिसरात धमकावून १ लाख ३७ हजार रुपयांची रोकड घेतली आहे.
याचबरोबर दोन वेळा पिडीत तरुणाच्या घरी येवून त्याच्या आईला शिवीगाळ केली आहे. याबाबत पिडीत तरुणाने शहर पोलिसांत सविस्तर फिर्याद दिली असून पोलिसांनी संशयीत महिलेसह दोघांवर खंडणी, धमकावल्याप्रकरणी गुन्हा दाखल केला आहे.