धर्म आणि नाव लपवून उत्तराखंडमधील एका तरुणाने तरुणीला प्रेमाच्या जाळ्यात ओढले होते. विशेष म्हणजे हे दोघेही लग्नाच्या बेडीत अडकणार होते, पण एक लग्नाच्या एक दिवस अगोदरच युवकाचा बनाव उघडकीस आल्याने तरुणीने संताप व्यक्त करत लग्न मोडलं. कारण, मूळ हसीन सैफी नावाचा हा युवक आशिष नावाने वावरत होता, त्यातूनच त्याने तरुणीला आपल्या प्रेमाच्या जाळ्यात ओढले होते. हसीनचं खरं नाव आणि धर्म कळल्यानंतर तरुणीने त्याच्यासोबत भांडण केलं. त्यावेळी, तिथे जमा झालेल्या लोकांसमोरच तिने हसीनवर गंभीर आरोप केले.
हसीनने अश्लील व्हिडिओ बनवून माझी फसवणूक केली, तसेच लग्नासाठी माझ्यावर दबाव टाकल्याचा गंभीर आरोप युवतीने केला आहे. याबाबत माहिती मिळताच विश्व हिंदू परिषदेचे कार्यकर्ते घटनास्थळी पोहोचले आणि त्यांनी गोंधळ घातला. याप्रकरणी पोलिसांनीही घटनास्थळी धाव घेत तरुणीची बाजू ऐकून घेतली. त्यानंतर, युवतीच्या फिर्यादीवरुन दादरी पोलिसांनी फसवणूक, अत्याचार आणि जबरदस्तीने धर्म परिवर्तनाबाबतचा गुन्हा हसीनविरुद्ध दाखल केला आहे. पोलिसांनी आरोपीला अटकही केली.
उत्तराखंड निवासी ही युवती नोएडातील एका कंपनीत नोकरी करते. याच कंपनीत हसीन सैफी हाही काम करत असून त्याने नाव आणि धर्म बदलून तिच्याशी मैत्री केली. त्यानंतर, या मैत्रीचं रुपांतर प्रेमात झालं. आपल्या प्रेमाच्या जाळ्यात अडकवून हसीनने युवतीसोबत अश्लील व्हिडिओही बनवले. त्यानंतर, आरोपीने युवतीसोबत लग्नासाठी दबाव टाकला. येथील दादरी एस्कोर्ट कॉलनीत मुलीला एक खोलीही बघून दिली होती. दोघांचे सोमवारी लग्नही होणार होते. मात्र, रविवारीच या तरुणीला हसीन उर्फ आशीषची पार्श्वभूमी कळाली आणि भांडाफोड झाला.
हसीनचे वडिल त्यांच्या मुलाच्या शोधात दादरी एस्कॉर्ट परिसरात आले होते. त्यावेळी, शकील यांनी हसीन म्हणत आशिषची विचारणा केली. त्यावरुन, हसीन सैफीचा भांडाफोड झाला आणि सत्य समोर आलं.