नवी दिल्ली - दिल्लीमध्ये एक धक्कादायक घटना घडली आहे. एका इन्स्टा पोस्टमुळे अल्पवयीन मुलाने जीव गमावला आहे. 17 वर्षीय मुलाची निर्घृण हत्या करण्यात आली असून आरोपीने चाकूने वार केला आहे. दिल्लीतील उत्तम नगर भागात ही भयंकर घडली आहे. या घटनेने एकच खळबळ उडाली आहे. काही अल्पवयीन मुलांनी व परिसरातील लोकांनी मिळून एका व्यक्तीची चाकूने 10 वार करून हत्या केली. मृत मुलाने या हत्या प्रकरणातील आरोपीचा फोटो इन्स्टाग्रामवर पोस्ट करून त्यावर काही कमेंट्स लिहिल्याची माहिती मिळत आहे.
मिळालेल्या माहितीनुसार, शौकत असं हत्या करण्यात आलेल्या मुलाचं नाव आहे. परिसरातील काही गुंडांनी शौकतने इन्स्टा पोस्ट केल्यानंतर त्याचं अपहरण केलं आणि त्याला एका फ्लॅटमध्ये नेऊन त्याच्यावर चाकूने वार केले. त्यानंतर आरोपींनी तेथून पळून काढला. या प्रकरणातील मुख्य आरोपी सोहन लाल हा या भागातील सराईत गुन्हेगार सध्या फरार असल्याचे सांगण्यात येत आहे. शौकतने सोहन लालचा फोटो इन्स्टाग्रामवर पोस्ट केला आणि त्यावर कमेंट लिहिली, असं आरोपींचे म्हणणे आहे. ही पोस्ट पाहिल्यानंतर सर्व आरोपींचा संताप अनावर झाला आणि त्यांनी शौकतचे अपहरण केले.
आश्‍चर्याची गोष्ट म्हणजे शौकतकडे स्वतःचा स्मार्टफोनही नव्हता. तो नेहमी भाऊ आणि मित्रांचे फोन घेऊन सोशल मीडिया इन्स्टाग्रामवर रील काढत असे. 26-27 डिसेंबरच्या मध्यरात्री, पोलिसांना एक पीसीआर कॉल आला की एक व्यक्ती सुप्रीम मॉडेल स्कूल, उत्तम नगरजवळ बेशुद्ध पडली आहे. जेव्हा दिल्ली पोलीस अधिकारी घटनास्थळी पोहोचले तेव्हा शौकत तिथे पडला होता, त्याला महिंदरू हॉस्पिटलमध्ये दाखल करण्यात आले, त्यानंतर डॉक्टरांनी त्याला डीडीयू हॉस्पिटलमध्ये रेफर केले. मात्र जीडी हॉस्पिटलमध्ये पोहोचण्यापूर्वी शौकतचा मृत्यू झाला होता.
शौकतवर आईस्क्रीम तोडण्यासाठी वापरण्यात येणाऱ्या तीक्ष्ण चाकूने अनेक वार केल्याचे पोस्टमॉर्टम अहवालात स्पष्ट झाले आहे. त्याच्या शरीरावर 8 ते 10 जखमांच्या खुणा आढळून आल्या आहेत. शौकतच्या कुटुंबीयांनी परिसरातील गुंड आणि गुन्हेगार सोहन लालवर आरोप केले होते. पोलिसांनी तपास सुरू केला असता हत्येतील तीन अल्पवयीन मुलांना ताब्यात घेण्यात आले आहे. तर सोहनलाल अद्याप फरार आहे. सोहनलाल यांच्यावर आरोप आहे की तो अनेकदा परिसरात दादागिरी करत असे. तो लोकांसोबत मारहाणीचे व्हिडिओ सोशल मीडियावर अपलोड करायचा. पोलीस आरोपीचा शोध घेत आहेत. एका हिंदी वेबसाईटने याबाबतचे वृत्त दिले आहे.