एखाद्या ठिकाणचा प्रवास करत असताना काही वेळा अनेकजण लिफ्ट मागतात. माणुसकीच्या नात्याने त्या लोकांना मदतही केली जाते. पण कधीकधी अशा लोकांना लिफ्ट देणं धोकादायक ठरू शकतं, चांगलंच महागात पडू शकतं. अशीच एक धक्कादायक घटना आता समोर आली आहे. मध्य प्रदेशातील इंदूरमध्ये एका महिलेने लिफ्ट मागून पुढे जे काही केलं ते अतिशय भयंकर होतं. या महिलेचा एक व्हि़डीओ सोशल मीडियावर जोरदार व्हायरल होत आहे.
रात्रीच्या वेळेस वर्दळ नसलेल्या रस्त्यावर उभं राहून महिलेने लिफ्ट मागितली. रस्त्याने जाणाऱ्याने लिफ्ट दिल्यावर चाकूचा धाक दाखवून महिलेने त्या व्यक्तीची लूटमार केली. ही बाब निदर्शनास आल्यानंतर पोलिसांनी या प्रकरणाचा तपास सुरू केला आहे. गांधीनगर भागातील सुपर कॉरिडॉरवर रात्र होताच एक महिला एकटी उभी राहते. तिथून एखादी व्यक्ती जाताना पाहून ती त्याला लिफ्टसाठी थांबवते. रात्रीच्या वेळी उभी असलेली महिला पाहून लोक तिला लिफ्ट देतात.
महिलेला ज्याच्याकडून लिफ्ट घ्यायची असते त्याला ती डिअर असं म्हणून थांबवते. तिच्या बोलण्यावरून ड्रायव्हर तिला हाय प्रोफाईल स्त्री समजतो आणि तिच्या बोलण्यात येऊन सहज लिफ्ट देतो. गाडी निर्जन भागात पोहोचताच महिला या व्यक्तीला थांबवून त्याला खोट्या गुन्ह्यात अडकवण्याची धमकी देते आणि लूट करते. एखाद्याने विरोध केला तर चाकू दाखवून महिला त्याला लुटते. अशाच एका लुटमारीच्या घटनेचा व्हिडिओ सोशल मीडियावर व्हायरल होत आहे.
पोलिसांनी ही बाब निदर्शनास आल्यानंतर संपूर्ण प्रकरणाचा तपास सुरू केला आहे. या संपूर्ण प्रकरणाचे काही व्हिडिओ वरिष्ठ पोलीस अधिकाऱ्यांना मिळाले आहेत. अधिकाऱ्यांनी दिलेल्या माहितीनुसार, व्हिडिओच्या आधारे पोलीस वेगवेगळ्या भागात रात्रीची गस्त घालतील आणि आरोपींचा शोध घेतील. एसीपी रुबिना मिर्झा यांनी सांगितलं की, तक्रारदाराने तक्रार केली आहे. आम्ही या घटनेचा तपास करत आहोत. लवकरच आरोपीला पकडलं जाईल. एका हिंदी वेबसाईटने याबाबतचे वृत्त दिले आहे.