मंगेश कराळे
नालासोपारा - शहरात एका विवाहित तरुणीवर अ‍ॅसिडफेकून तिला विद्रूप करण्यात आल्याची धक्कादायक घटना घडली आहे. या घटनेत तिच्यासोबत तिचा प्रियकर ही जखमी झाला आहे. सदर घटनेनंतर शहरात एकच खळबळ उडाली आहे.
नालासोपाऱ्याच्या वाकण पाडा येथील अवधूत आश्रम रोड येथे राहणारी करिष्मा अली (२०) या विवाहित तरुणीने घाटकोपर येथील तौफिक इद्रीसी बरोबर प्रेमविवाह केला होता. मात्र लग्नानंतर काही दिवसानंतर त्यांच्यात बिनसल्यानंतर तिने तौफिकला सोडचिठ्ठी देत कामरान अन्सारी या घाटकोपरमधील दुसऱ्या तरुणासोबत ती लिव्ह अँड रिलेशनशिपमध्ये राहत होती. मात्र काही दिवसानंतर कामरान अन्सारीने तिच्यासोबत लग्नाला नकार दिल्याने तिने त्याला सोडचिठ्ठी देत नालासोपाऱ्यातील कमाल खान सोबत तिसऱ्यांदा घरोबा केला.
ही गोष्ट पहिला पती तौफीक इद्रीसी व दुसऱ्या प्रियकर कामरान अन्सारी यांना कळताच त्यांनी करिष्मा अलीला मेरी नही तो किसी और की नही होने दुंगा, तुम्हे बरबाद कर दुंगा असे म्हणत धमकी दिली होती. अखेर दोन आरोपींनी संगनमताने रविवारी रात्री अडीच वाजण्याच्या सुमारास ती नालासोपारा येथे राहत असलेल्या घराच्या खिडकीची स्लाइडिंग उघडत झोपलेल्या करिष्मा व कमालवर अ‍ॅसिड फेकून ते पळून गेले. या घटनेत दोघेही जबर जखमी झाले असून त्यांच्यावर सोपारा रुग्णालयात उपचार सुरू आहेत. हॉस्पिटलमधून एम एल सी आल्यानंतर मंगळवारी पेल्हार पोलीस पोलिसांनी या घटनेबाबत गुन्हा दाखल केला आहे.
सदर घटनेप्रकरणी गुन्हा दाखल करण्यात आला आहे. पीडित तरुणीची अवस्था व्यवस्थित असून तिला हॉस्पिटलमधून आज संध्याकाळी डिस्चार्ज देणार आहेत. दोन्ही आरोपींचा शोध व गुन्ह्याचा पुढील तपास सुरू आहे.
- वसंत लब्दे (वरिष्ठ पोलीस निरीक्षक, पेल्हार पोलीस ठाणे)