गोंडपिपरी / वढोली (चंद्रपूर) : पती-पत्नीत झालेल्या वादाचे रुपांतर क्रूर घटनेत झाले. तिला विद्युत करंट देऊन मारण्याचा प्रयत्न फसल्यानतर तिच्या मानेवर कुऱ्हाडीने घाव घालून तिला ठार मारले. त्यानंतर स्वत: विष प्राशन करून आत्महत्येचा प्रयत्न केला. ही धक्कादायक घटना शनिवारी मध्यरात्री गोंडपिपरी तालुक्यात येणाऱ्या भंगाराम तळोधी येथे घडली. योगिता राजू बावणे (३५, रा. भंगाराम तळोधी) असे मृत महिलेचे नाव आहे. दरम्यान, आत्महत्येचा प्रयत्न करणाऱ्या पती राजू बावणे (४२, रा. भंगाराम तळोधी) याच्यावर ग्रामीण रुग्णालयात पोलीस बंदोबस्तात उपचार सुरू आहेत.
गोंडपिपरी तालुक्यातील भंगाराम तळोधी येथील योगिता बावणे, राजू बावणे या पती-पत्नीत वाद झाला. त्यानंतर रात्री दीड वाजताच्या सुमारास राजू बावणे याने विद्युत करंट देऊन पत्नीला मारण्याचा प्रयत्न केला. मात्र, विद्युत करंट देऊनही ती जिवंत असल्याचे पाहून राजूने अतिशय निष्ठूरतेने पत्नी योगिताच्या गळ्यावर कुऱ्हाडीने वार करून तिला पलंगावरच ठार केले. घटनेनंतर घाबरलेल्या पतीने विष प्राशन करून आत्महत्येचा प्रयत्न केला. घटनेची माहिती मिळताच पोलिसांनी तातडीने राजू बावणे यास उपचारासाठी गोंडपिपरी ग्रामीण रुग्णालयात दाखल करण्यात आले.