धनबाद : आम्हाला हुंडा अजिबात नको, फक्त तुमची मुलगी द्या, आमच्या काहीही मागण्या नाहीत, असे सांगणारा पती व त्याच्या कुटुंबीयांनी ऐन लग्नाच्या वेळी कार पाहिजे असा हट्ट धरला. मुलीच्या वडिलांना ती लगेच देणे शक्य नव्हते. त्यामुळे पती व त्याच्या घरच्यांनी तिला इतकी मारहाण केली की, ती त्यात मरणच पावली.
झारखंडमधील धनबादच्या एका पित्याने दीड वर्षांपूर्वी आपली मुलगी मंजुम आरा हिचा विवाह मोहमद रियाजुदनदिन अन्सारी याच्याशी लावून दिला. विवाहाआधी आम्हाला हुंडा वा भेटवस्तू नको,असे सांगणाऱ्या पतीने लग्न होताच वाहनाची मागणी केली. वधुपित्याला ती मागणी लगेच पूर्ण करणे शक्य नव्हते. त्यामुळे त्यांनी अवधी मागून घेतला; पण पती व त्याच्या कुटुंबीयांनी कार लवकर हवी, म्हणून मंजुमचा छळ सुरू केला. त्यामुळे तिने माहेरी जायचे ठरविले; पण कार मिळेपर्यंत तुला माहेरी जाता येणार नाही, असे सासरच्यांनी सांगितले.
ती बाब मुलीच्या वडिलांनी पोलिसांना सांगितली; पण त्यांनी तक्रारीची गंभीर दखल घेतली नाही. घटनेनंतर महिलेच्या सासूने मुलीच्या वडिलांना फोन करून तुमची मुलगी रुग्णालयात आहे, असे कळवले आणि पती व त्याच्या घरातील सारे जण तेथून पळून गेले. ते अद्याप फरार असून, पोलीस त्यांचा शोध घेत आहेत.