बुलढाणा : शेती नावावर करुन देण्याच्या कारणावरुन चक्क मुलानेच आईला विष पाजल्याचा धक्कादायक प्रकार नांदुरा तालुक्यातील गोरसिंग येथे घडला. याप्रकरणी मोताळा तालुक्यातील बोराखेडी पोलीस ठाण्यात आरोपी पुत्राविरुद्ध २८ ऑगस्ट रोजी गुन्हा दाखल करुन अटक करण्यात आली आहे.
नांदुरा तालुक्यातील गोरसिंग येथील रहिवासी जयवंताबाई लक्ष्मण सावंत (६५) यांनी पोलिसांना दिलेल्या जबाबात म्हटले आहे की, त्यांचा मुलगा प्रभाकर लक्ष्मण सावंत (४०) याने दोन एकर शेती नावावर करुन देण्याच्या कारणावरून त्याची आई जयवंताबाई लक्ष्मण सावंत यांना विष पाजले. अशा तक्रारीवरुन बोराखेडी पोलीस स्टेशनमध्ये आरोपी मुलाविरुद्ध विविध कलमान्वये गुन्हा दाखल करण्यात आला आहे. याप्रकरणातील महिलेवर खासगी रुग्णालयात उपचार सुरु असून, आरोपी प्रभाकर सावंत यास २८ ऑगस्ट रोजी रात्री अटक करण्यात आली आहे. याप्रकरणाचा पुढील तपास सहाय्यक पोलीस निरीक्षक विकास पाटील हे करीत आहेत.