कल्याण :
पूर्वेत राहणाऱ्या १८ वर्षीय तरुणीने रविवारी रात्री राहत्या बिल्डिंगच्या टेरेसवरून उडी मारून आत्महत्या केल्याची नोंद कोळसेवाडी पोलीस ठाण्यात केलेली असली, तरी या घटनेच्यावेळी तिची मैत्रीण काजल जैस्वाल घटनास्थळी हजर होती, अशी माहिती तपासात उघड झाली आहे. त्या तरुणीचे काही मित्रही हजर होते, अशी सूत्रांची माहिती आहे. त्यामुळे लैंगिक अत्याचाराचा व्हिडीओ व्हायरल करण्याची धमकी दिली गेल्याने त्या तरुणीने आत्महत्या केली की, हा घातपाताचा प्रकार आहे, अशी चर्चा सुरू झाली.
घटना घडण्याच्या एक तास आधी रात्री ९.२८ ला तिने मोबाइल नोटपॅडमध्ये तिला होत असलेल्या त्रासाबद्दल नमूद केले होते. त्यानंतर तिची मैत्रीण व मित्र तिला भेटायला आले व गच्चीवरून उडी मारून तिने जीव दिला की, तिला तसे करण्यास भाग पाडले गेले, याबाबत तर्कवितर्क केले जात आहेत.तरुणीचे एका मुलावर प्रेम होते. शरीरसंबंधाच्या वेळी त्याने काढलेला व्हिडीओ मित्रांना दाखविला. मित्रांनी तिला व्हिडीओ व्हायरल करण्याची धमकी देत तिच्यावर अत्याचार केले. गेले दीड वर्षे हा अत्याचार सुरू होता. अखेर, या त्रासाला कंटाळून तिने आत्महत्येचे पाऊल उचलले.
नोटपॅडवरील लिखाण ठरणार महत्त्वाचा पुरावातरुणीने २४ मे च्या रात्री दीडच्या सुमारास तिच्या मोबाइलच्या नोटपॅडमध्ये तिच्याबाबतीत घडलेला सर्व प्रकार नमूद केला. आत्महत्येच्या दिवशी १२ जूनला रात्री ९.२८ वाजता तिने तिच्या मोबाइलच्या नोटपॅडमध्ये शेवटचा मजकूर लिहिला. त्यानंतर एक तासाने १०.३० वाजता आत्महत्येची घटना घडली. नोटपॅडमध्ये काय लिहिले आहे, हा तपासाचा भाग असल्याचे पोलिसांचे म्हणणे आहे. तरुणी मृत झाल्याने तिचा जबाब पोलिसांना घेता येणार नाही.
परिचितांनीच केला घात एका १५ वर्षीय अल्पवयीन मुलीवर तब्बल ३३ नराधमांनी सामूहिक बलात्कार केल्याची धक्कादायक घटना मानपाडा हद्दीत गतवर्षी २३ सप्टेंबरला घडली होती. व्हिडीओ व्हायरल करण्याची धमकी देऊन नऊ महिन्यांत डोंबिवलीसह विविध ठिकाणी पीडितेवर बलात्कार झाला होता. याच घटनेची पुनरावृत्ती कल्याणमध्ये घडली असून यात मात्र पीडित तरुणीला जीव गमवावा लागला आहे.