आसामच्या गुवाहाटीमध्ये एक धक्कादायक घटना समोर आली आहे. जयदीप देव नावाच्या तरुणाने आपल्या आईचा मृतदेह तब्बल तीन महिने घरात ठेवला. तिच्यावर अंत्यसंस्कार केले नाहीत. जयदीपची आई पूर्णिमा देव यांच्या मृत्यूनंतर मुलाने मृतदेह तसाच ठेवला. अंत्यसंस्काराची काही व्यवस्थाच केली नाही. तो त्याची दैनंदिन काम करत होता. आई जिवंत आहे असंच तो सर्वांना दाखवत होता.
जयदीप नियमित बँकेत जाऊन पैसे काढत होता. जयदीपच्या विचित्र वागण्याने त्याच्या शेजाऱ्यांना थोडा संशय आला, त्यांनी अखेर पोलिसांना याबाबत माहिती दिली. पोलीस जयदीपच्या घरी पोहोचले असता त्यांना एका बेडवर महिलेची हाडं आढळून आली. पूर्णिमा देव असं मृत महिलेचं नाव आहे. पतीच्या निधनानंतर पूर्णिमा जयदीपसोबत राहत होत्या असं तपासात समोर आलं. पौर्णिमा यांचे शेजाऱ्यांशी चांगले संबंध होते, पण अनेक दिवस त्या दिसल्या नाहीत, तेव्हा शेजाऱ्यांना त्यांची काळजी वाटू लागली.
घर बंद असल्याने आणि आजूबाजूला कचरा साचल्याने शेजाऱ्यांची चिंता आणखी वाढली. शेजाऱ्यांनी जयदीपला त्याच्या आईबद्दल विचारलं आणि घराच्या आजुबाजूचा परिसर स्वच्छ करण्यास सांगितलं तेव्हा त्याने धक्कादायक उत्तर दिलं. आई-वडील दोघांचाही मृत्यू झाला असं सांगितलं. तसेच घर साफ करण्यास नकार दिला. त्याच्या विचित्र वागण्यामुळे शेजाऱ्यांनी अधिकाऱ्यांना याची माहिती दिली.
जयदीपचं मानसिक स्वास्थ्य ठीक नसल्याचं पोलीस तपासात समोर आलं आहे. त्याने आई पौर्णिमा देव यांना अनेक वर्षे घरात डांबून ठेवलं आणि घराबाहेरही पडू दिलं नाही. मृत्यूनंतर जयदीपने अंत्यसंस्कारही केले नाहीत आणि आईच्या मृतदेहासोबत जगत राहिला. जयदीपकडे कोणतंही काम नव्हतं आणि तो त्याच्या आईच्या पेन्शनवर अवलंबून होता. शेजाऱ्यांना सुरुवातीला वाटलं की तो स्वतःसाठी आणि आईसाठी बाहेरून जेवण आणत आहे, पण सत्य काही वेगळंच होतं.