धक्कादायक! मेजर रँकचे दोन अधिकारी मैत्रिणींसोबत फायरिंग रेंजमध्ये गेले, लुटारुंचा एकीवर सामुहिक बलात्कार

महिलांवरील लैंगिक अत्याचाराच्या घटनांनी एकामागोमाग एक राज्य हादरू लागले आहे. मध्य प्रदेशमध्ये मेजर रँकच्या दोन दोन अधिकाऱ्यांसोबत असूनही महिला सुरक्षित नसल्याची धक्कादायक घटना घडली आहे. मेजर रँकच्या दोन ट्रेनी अधिकाऱ्यांसोबत फायरिंग रेंजच्या जागेत फिरायला गेलेल्या त्यांच्या दोनपैकी एका मैत्रिणीवर लुटारुंनी सामुहिक बलात्कार केल्याची घटना घडली आहे. 

इंदौर जिल्ह्यातील आर्मीच्या कॅम्पच्या परिसरातच हा प्रकार घडला आहे. लुटारुंनी या दोन अधिकाऱ्यांना मारहाणही केली आहे. पोलिसांनी दोन आरोपींना अटक केली असून उर्वरित सहा जण फरार झाले आहेत. इंदौरच्या महूमध्ये आर्मीचे कॉलेज आहे. तिथे प्रशिक्षण घेण्यासाठी हे दोन अधिकारी आले होते. मंगळवारी रात्री अडीजच्या सुमारास या दोघांनी भाड्याने एक कार मागविली होती. दोन महिला मैत्रिणींना घेऊन हे दोघे जाम गेटच्या दिशेने फिरायला गेले. तिथे असलेल्या फायरिंग रेंजमध्ये कार उभी करून हे त्यांच्या मैत्रिणींसोबत बोलत बसले होते. एवढ्यात त्यांच्या कारला पिस्तुल, चाकू, दांडे घेऊन आलेल्या आठ लुटारुंनी घेरले. सैन्याच्या अधिकाऱ्यांना मारहाण करून त्यांच्याकडील मौल्यवान वस्तू, पैसे काढून घेतले. 

हे लुटारू एवढ्यावरच थांबले नाहीत. त्यांनी एका अधिकाऱ्याला आणि एका तरुणीला आपल्यासोबत ठेवत उर्वरित दोघांना पैसे आणण्यासाठी पाठविले. त्यांनी या लोकांकडे १० लाख रुपयांची मागणी केलेली. या लुटारुंनी एका मेजरला बाजुला नेले व त्याच्यासोबत असलेल्या मैत्रिणीवर लैंगिक अत्याचार केले. 

दुसरा मेजर आणि तरुणी आर्मी कॉलेजच्या परिसरात पोहोचेपर्यंत उशीर झाला होता. या मेजरने त्याच्या यूनिट कमांडिंग ऑफिसरला याची माहिती दिली. त्याने पोलिसांना बोलवत घटनास्थळ गाठले. एवढ्या गाड्या येत असल्याचे पाहून लुटारू पळून गेले होते. पोलिसांनी मेजरच्या सांगण्यावरून लुटमार, मारहाण, खंडणी आणि सामुहिक अत्याचाराचा गुन्हा दाखल केला आहे. तसेच १० टीम बनवून दोन आरोपींना ताब्यात घेतले आहे. उर्वरित आरोपांचा शोध सुरु आहे. या महिला मैत्रिणी आर्मीच्याच अधिकारी होत्या की बाहेरील कोणी याचा अद्याप खुलासा करण्यात आलेला नाही.