साकोली(भंडारा) : चोरट्यांनी एकाच रात्री दोन सराफा दुकानांसह पाच ठिकाणी चोरी केल्याची घटना सकोली येथे शुक्रवारी सकाळी उघडकीस आली. चोरट्यांनी ५० लाखांच्या मुद्देमालासह सराफा दुकानातून सहा बुलेट व बंदूक लंपास केल्याने शहरात एकच खळबळ उडाली.
सकोली येथे राष्ट्रीय महामार्गावर रुपेश खेडीकर यांचे खेडीकर ज्वेलर्स आणि राजेश शहाणे यांचे पुष्पंम ज्वेलर्स आहे. शुक्रवारी सकाळी दोन्ही सराफा दुकानात चोरी झाल्याचे लक्षात आले. या घटनेची माहिती तात्काळ साकोली पोलिसांना देण्यात आली. चोरट्यांनी प्राथमिक अंजादानुसार ५० लाखांचा ऐवज चोरुन नेल्याची माहिती आहे. तसेच खेडीकर ज्वेलर्समधून सहा बुलेट व बंदूक चोरुन नेली. या सोबत जिल्हा बँकेचे अध्यक्ष सुनील फुंडे यांच्या सुमन डेअरीतही चोरी झाली. तेथून चोरट्यांनी २२ हजार रोख लंपास केले. तसेच दोन टपऱ्याही चोरट्यांनी फोडल्या. एकाच रात्री पाच ठिकाणी चोरी झाल्याने एकच खळबळ उडाली आहे. चोरी झालेल्या दुकांनासमोर नागरिकांची मोठी गर्दी झाली होती.