पंजाबच्या रुपनगर जिल्ह्यात एक धक्कादायक व्हिडीओ समोर आला आहे. एका वृद्ध महिलेला अमानुषपणे मारहाण केल्याचा व्हिडीओ आहे. महिलेसोबत अमानुष कृत्य करणारा दुसरा कोणी नसून तिचाच मुलगा आहे. या वृद्ध महिलेवर मुलगा, नातू आणि सुनेने केलेल्या अत्याचाराचा व्हिडीओ सध्या सोशल मीडियावर व्हायरल होत आहे. सर्वत्र संताप व्यक्त केला जात आहे.
75 वर्षांच्या आशा वर्मा मुलगा अंकुर वर्मा, सून आणि नातवासोबत राहतात. वृद्धापकाळामुळे त्या बऱ्याच दिवसांपासून आजारी होत्या. आशा वर्मा यांच्या मुलीचे नाव दीपशिखा आहे. भाऊ तिच्या आईशी अमानुषपणे वागतो आणि मारहाण करतो, अशी तक्रार तिने पोलीस ठाण्यात दाखल केली. दीपशिखाने लुधियाना येथील सामाजिक कार्यकर्ता गुरप्रीत सिंग यांच्याकडेही मदत मागितली.
गुरप्रीत त्याच्या टीमसोबत दीपशिखाच्या आईच्या घरी पोहोचला आणि तिथून आईची सुटका करून तिला हॉस्पिटलमध्ये दाखल केलं. 2 ऑक्टोबरच्या या सीसीटीव्ही फुटेजमध्ये आशा वर्मा बेडवर पडलेल्या दिसत आहेत. मुलगा अंकुर वर्मा तेथे येतो आणि त्यांना मारहाण करतो. अंकुर आशा वर्मा यांचे केस ओढतो, तिचे डोकं आपटतो, कानाखाली मारतो, हा व्हिडीओ अंगावर काटा आणणारा आहे.
दीपशिखाने पोलिसांना आशा वर्मा यांच्या खोलीत लावलेल्या सीसीटीव्हीचं फुटेज देखील दाखवलं. या व्हिडिओच्या पुढील फुटेजमध्ये अंकुरचा मुलगा आशा यांच्या खोलीत येतो आणि आशा यांच्या पलंगावर पाणी फेकत असल्याचे दिसत आहे. मग अंकुरला फोन करताो आणि आजीने लघवी केली असं सांगतो. यानंतर अंकुर आईला बेदम मारहाण करत आहे.