२० केंद्रांवर कोरोना प्रतिबंधात्मक डोस

जून महिन्यांपासून जिल्ह्यात कोरोना रुग्णांची संख्या घटू लागली आहे. मात्र, काेरोना विषाणू संसर्गाचा धोका अद्याप पूर्णत: टळलेला नाही, शिवाय येत्या काही महिन्यांत कोरोनाची तिसरी लाट येण्याचे भाकीत तज्ज्ञांनी वर्तविले आहे. त्यामुळे कोरोना संसर्गापासून बचाव करण्यासाठी मास्क, फिजिकल डिस्टन्स, हात स्वच्छ धुणे या त्रिसूत्रीचे पालन करण्याचे आवाहन आरोग्य विभागाकडून केले जात आहे. सोबतच कोरोना प्रतिबंधात्मक लसीकरण मोहीम राबविण्यात येत आहे. मंगळवारी लोहारा, मुरुम, सास्तूर, भूम, वाशी, तेर, तुळजपापूर, उमरगा, परंडा, कळंब उपजिल्हा रुग्णालय, उस्मानाबाद येथील शासकीय आयुर्वेदिक महाविद्यालय, जिल्हा रुग्णालय, पोलीस हॉस्पिटल, उमरगा येथील जिजामाता प्राथमिक विद्यामंदिर, जिल्हा परिषद प्रशाला, मुरुम येथील ज्ञानदान विद्यालय, कळंब येथील फुले-आंबेडकर वाचनालय, परंडा येथील समर्थ नगर, लोहारा तालुक्यातील भारत माता मंदिर, वाशी येथील शिवशक्ती नगर भागातील जिल्हा परिषद शाळा या ठिकाणी कोविशिल्ड लस उपलब्ध असेल. या केंद्रांवर १८ वर्षांपुढील नागरिक, ज्येष्ठ नागरिक, दुर्धर आजारी व्यक्ती, दिव्यांग यांना प्राधान्याने लस घेता येईल. ४५ वर्षांपुढील नागरिकांना ‘ऑन द स्पॉट’ लस मिळणार आहे.