माता व बालकांचे आरोग्य सुधारण्यांचे दृष्टीने गर्भवती महिला व स्तनदा मातेला सकस आहार घेण्यास प्रोत्साहित करून त्यांच्या आरोग्यात सुधारणा करण्यासाठी जन्माला येणाऱ्या प्रत्येक नवजात बालकांचेही आरोग्य सुधारावे. माता व बाल मृत्यूदरात घट होऊन तो नियंत्रित राहावा यासाठी प्रधानमंत्री मातृत्व वंदना योजना १ जानेवारी २०१७ पासून राज्यभर राबविण्यात येत आहे. या योजनेच्या लाभासाठी २०१७ ते २०२२ या कालावधीत तुळजापूर तालुक्याला ६ हजार ९८ चे उद्दिष्ट दिले होते. यापैकी आतापर्यंत तुळजापूर आरोग्य यंत्रणेने ९९ टक्के काम पूर्ण केले असून, ६ हजार ६४ महिलांना २ कोटी ४३ लाख ५३ हजार रुपये त्यांच्या आधार संलग्न बँक खाते किंवा पोस्ट ऑफिसमधील खात्यात डीबीटीद्वारे जमा केले आहेत.
लाभासाठी कुठे संपर्क करायचा...
या योजनेचा लाभ घेण्यासाठी आरोग्य सेवक, आशा कार्यकर्ती, अंगणवाडी सेविका, प्राथमिक आरोग्य केंद्र, आरोग्य उपकेंद्र, तालुका आरोग्य अधिकारी कार्यालय आदी ठिकाणी संपर्क साधता येईल.
ही कागदपत्रे हवी...
लाभार्थ्यांनी योजनेचा लाभ घेण्यासाठी आधी गरोदर महिलेची नोंदणी करणे आवश्यक आहे. पहिला, दुसरा व तिसऱ्या हप्त्याचा लाभ मिळण्याकरिता लाभार्थीचे आधार कार्ड, पतीचे आधार कार्ड, बँक पासबुकची पहिल्या पानाची झेरॉक्स, बाळाचा जन्माचा दाखला, माता बाल संरक्षक कार्ड इत्यादी देणे आवश्यक आहे.
तीन टप्प्यात मिळणार लाभ...
लाभार्थीने गरोदरपणाची नोंद केल्यानंतर १५० दिवसाच्या आत १ हजार, किमान १ प्रसुतीपूर्व तपासणी झाल्यानंतर २ हजार रुपयांचा हप्ता मिळतो. तिसरा हप्ता हा प्रसूती होऊन बाळाला लसींची मात्रा दिल्यानंतर २ हजार रुपयांचा येतो.
पहिला टप्पा -१ हजार रुपये
दुसरा टप्पा -२ हजार रुपये
तिसरा टप्पा -२ हजार रुपये
पात्रतेचे निकष काय...
पहिल्या अपत्यासाठी गरोदर असणाऱ्या सर्व पात्र गर्भवती महिला आणि स्तनदा माता या योजनेसाठी पात्र असतील. मात्र वेतनासह मातृत्व रजा मिळणाऱ्या नोकरदार महिलांना ही योजना लागू नाही. नैसर्गिक गर्भपात झाल्यास किंवा मृत बालक जन्मल्यास त्या टप्प्यापुरताच लाभ एकदाच लागू राहील.