तुळजापूर (जि. धाराशिव) - सहावीच्या वर्गात शिकत असलेल्या एका १२ वर्षीय अल्पवयीन मुलीवर ३३ वर्षीय नराधमाने लैंगिक अत्याचार केला. हा नराधम एवढ्यावरच थांबला नाही. नात्यातील एका मुलीस धमकावून अत्याचाराचे माेबाइलमध्ये छायाचित्रण करण्यासही भाग पाडले. ही संतापजनक घटना तुळजापूर तालुक्यातील एका गावात गुरुवारी घडली. या प्रकरणी शुक्रवारी तुळजापूर पाेलिस ठाण्यात गुन्हा दाखल झाला आहे. पाेलिसांनी शनिवारी सकाळी सापळा रचून ज्वारीच्या शेतात दडून बसलेल्या नराधमास बेड्या ठाेकल्या.
पीडित मुलीचे आई-वडील माेलमजुरी करून कुटुंबाचा उदरनिर्वाह चालवितात. त्यामुळे ते दिवसभर घरी नसतात. गुरुवारी ते घरी आहेत की नाही, हे जाणून घेण्यासाठी नराधमाने पीडितेच्या वडिलांना फाेन करून ‘कुठे आहात?’ अशी विचारणा करून त्यांचा ठावठिकाणा घेतला. घरी नसल्याची खात्री हाेताच नराधमाने पीडितेचे घर गाठले. यावेळी घरात पीडित चिमुकलीच्या चार बहिणीही हाेत्या. दरम्यान, बारा वर्षीय चिमुकलीस आतल्या खाेलीत नेऊन अत्याचार केला.
यावेळी नात्यातील एका अल्पवयीन मुलीस धमकावून माेबाइलमध्ये अत्याचाराचे छायाचित्रण करण्यास तिला भाग पाडले. याचवेळी पीडित चिमुकलीची आई घरी आल्याची भणक लागताच नराधमाने घरातून धूम ठाेकली. मात्र, छायाचित्रण केलेला माेबाइल घरातच पडला. आईला पाहून पीडित चिमुकलीने हंबरडा फाेडला.
सर्व हकिकत सांगितल्यानंतर पीडितेला घेऊन आई-वडिलांनी तुळजापूर पाेलीस ठाणे गाठून फिर्याद दिली. त्यावरून संबंधित नराधमाविरुद्ध शुक्रवारी कलम ३७६ (३), ३७७, भादंविसंचे कलम ४, ६, ८, १०, १२, १४ पाेस्काे ६६ (ई) आयटी ॲक्टनुसार गुन्हा दाखल करण्यात आला आहे. दरम्यान, गुन्हा नाेंद हाेताच पाेलिसांनी नराधमाचा शाेध सुरू केला. ताे गावातीलच ज्वारीच्या शेतात दडून बसल्याची माहिती मिळाल्यानंतर पाेलिसांनी सापळा रचला अन् त्यास बेड्या ठाेकल्या.