लोहारा (जि.उस्मानाबाद) : दोन बाईक समोरासमोर धडकून झालेल्या अपघातात दोघांचा जागीच मृत्यू झाला. तर तीघेजण गंभीर जखमी झाले आहेत. हा अपघात गुरूवारी दुपारी साडेतीनच्या सुमारास लोहारा ते पाटोदा रस्त्यावरील बेंडकाळ गावाजवळ झाला. मनमोहन उर्फ नाना कदम व धीरज आनंदगावकर अशी मृतांची नावे आहेत.
तालुक्यातील मार्डीहून लोहाऱ्याकडे धीरज महादेव आनंदगावकर (वय २६), नितिन व्यंकट कोळी (वय २६ दोघे रा. भातागळी) व आकाश भोसले (वय २१ रा.मातोळा ता.औसा) तिघेजण एकाच बाईकवर प्रवास करत होते. तर कानेगाव येथील मनमोहन उर्फ नाना सुभाष कदम (वय ३०), रविकांत ज्ञानदेव कदम (वय ३५) हे दोघे एकाच बाईकवरून मार्डीकडे येत होते.
दरम्यान, बेंडकाळ गावाजवळ दोन्ही बाईक समोरासमोर धडकल्या. यात मनमोहन उर्फ नाना कदम व धीरज आनंदगावकर हे दोघे जागीच ठार झाले. तर रविकांत कदम, नितिन कोळी, आकाश भोसले हे तीघेजण गंभीर जखमी झाले आहेत. जखमींना लोहारा शहरातील ग्रामीण रूग्णालयात दाखल करण्यात आले. परंतु, यातील दोघांची प्रकृती चिंताजनक असल्याने त्यांना उस्मानाबाद येथील शासकीय रूग्णालयाकडे रवाना केले आहे.
भरधाव वेगाने घेतले दोन बळीदोन्ही दुचाकी भरधाव असल्याने भीषण अपघात झाला. दोन्ही दुचाकीची पुढील चाके तुटली होती. घटनेची माहिती मिळताच पोलिस किशोर शेवाळे, आनिल बोदमवाड यांनी घटनास्थळी भेट देऊन घटनेचा पंचनामा केला.