दुचाकीस्वाराने लांबविली महिलेची सोनसाखळी

जळगाव : काही दिवसांचा खंड पडत नाही तोच शहरात पुन्हा सोनसाखळी चोर सक्रिय झाल्याची प्रचिती बुधवारी आली. रस्त्याने पायी जाणा:या पुष्पा सुधाकर चौधरी यांच्या गळ्यातील 25 हजार रुपये किमतीची सोनसाखळी सकाळी सात वाजता अयोध्यानगरातून लांबविण्यात आल्याची घटना घडली आहे. याबाबत एमआयडीसी पोलीस स्टेशनला गुन्हा दाखल करण्यात आला आहे.

अयोध्यानगरातील गुरुकुल सोसायटीजवळ पुष्पा चौधरी या घरी पायी जात असताना विना क्रमांकाच्या दुचाकीवरून आलेल्या दोघांनी गळ्यातील सोनसाखळी तोडून नेली. चौधरी यांनी आरडाओरड केली, मात्र तितक्यात चोरटे पसार झाले होते. गेल्या तीन महिन्यांपासून सोनसाखळी चोरीच्या घटनांना आळा बसला होता. त्यातच एमआयडीसी पोलीस स्टेशनच्या हद्दीत अशा घटना घडण्याचे प्रमाण अगदी नगण्यच होते. पोलिसांना विसर पडताच चोरटे पुन्हा सक्रिय झाले.

उपनिरीक्षक कविता भुजबळ व हेड कान्स्टेबल जितेंद्र राठोड तपास करीत आहेत.