निवडणुकीत व्हीव्हीपॅटचा वापर नाही

निवडणूक निरीक्षक विनय गौडा यांची माहिती : करवंद येथील स्ट्रॉग रूमची केली पाहणी

शिरपूर : ७ जानेवारीला होत असलेल्या जिल्हा परिषद व पंचायत समितीच्या निवडणूकीत व्हीव्हीपॅट मशीन वापरले जाणार नाही़ मतदान जास्तीत जास्त व शांततेत होण्यासाठी जनजागृती करण्याचे आवाहन निवडणूक निरीक्षक तथा नंदुरबारचे सीईओ विनय गौडा यांनी येथील निवडणूक विभागाची पहाणी करतांना सांगितले़३० रोजी सकाळी निवडणूक निरीक्षक तथा नंदुरबारचे सीईओ विनय गौडा यांनी येथील निवडणूक विभागाला भेट देवून माहिती जाणून घेतली़ यावेळी धुळ्याचे उपमुख्य कार्यकारी अधिकारी संजय बागुल, निवडणूक निर्णय अधिकारी श्रीकुमार चिंचकर, सहाय्यक निवडणूक निर्णय अधिकारी तथा तहसिलदार आबा महाजन, नगरपालिका प्रशासकीय अधिकारी अमोल बागुल, पी़झेड़ रणदिवे, सुवर्णा पवार आदी उपस्थित होते़सुरूवातीला निवडणूक निरीक्षक सीईओ विनय गौडा यांनी मतदान केंद्राची माहिती जाणून घेतल्यानंतर तहसिल कार्यालयात असलेल्या विविध विभागांना भेटी दिल्यात़ त्यानंतर त्यांनी करवंद नाक्याजवळील मुकेशभाई पटेल टॉऊन हॉलमध्ये असलेल्या स्ट्राँगरूमची पहाणी करून कसे मतमोजणी केली जाईल त्याची माहिती तहसिलदार आबा महाजन यांच्याकडून घेतली़ या परिसराला पोलिस बंदोबस्त लावण्यात आला आहे़ यानंतर विनय गौडा यांनी सावळदे येथील जि़प़शाळेत असलेल्या मतदान केंद्राची पाहणी केली़