देवेंद्र पाठक, धुळे : चहाच्या उधारीचे पैसे मागितल्याच्या कारणावरून तरुणाला लाकडी दांडक्यासह लोखंडी रॉड, पाइपने मारहाण करण्यात आली. ही घटना वडजाई रोड भागात शुक्रवारी रात्री घडली. याप्रकरणी ६ जणांविरोधात चाळीसगाव रोड पोलिस ठाण्यात दंगलीचा गुन्हा दाखल करण्यात आला.
अजीजुरहेमान इमरान शेख (वय २४, रा. हबीबी शाळेजवळ, कबीरगंज, धुळे) या तरुणाने फिर्याद दाखल केली. त्यानुसार, चहाचे पैसे बाकी असल्याने ते मागितले. याचा राग आल्याने शिवीगाळ करत दमदाटी करण्यात आली. वाद विकोपाला गेल्याने लाकडी दांडका, लोखंडी रॉड, लोखंडाचा पाइप याने मारहाण करण्यात आली. तरुणाच्या मोटारसायकलीचेही नुकसान करण्यात आले. जीवे ठार मारण्याची धमकी देण्यात आली. ही घटना धुळे शहरातील वडजाई रोड येथील सांबर दूध डेअरी समोरील शाह नवाज हॉटेलसमोर शुक्रवारी रात्री १० वाजता घडली. यात गंभीर जखमी झाल्याने अजीजुरहेमान इमरान शेख या तरुणाला रुग्णालयात दाखल करण्यात आले. याप्रकरणी शनिवारी रात्री साडेदहा वाजता सहा जणांविरोधात दंगलीचा गुन्हा दाखल करण्यात आला. पोलिस हेड कॉन्स्टेबल एल. व्ही. चौधरी घटनेचा तपास करीत आहेत.