बाहुबलीची रिलीज होण्याआधीच 350 कोटींची कमाई

मुंबई, दि. 9 - प्रेक्षक सर्वात जास्त आतुरतेने ज्या चित्रपटाची वाट पाहत आहेत त्या 'बाहुबली 2' चित्रपटाने प्रदर्शित होण्याआधीच नवे रेकॉर्ड करण्यास सुरुवात केली आहे. चित्रपट प्रदर्शित होण्यासाठी अजून एक वर्ष बाकी असतानाही चित्रपटाने अगोदरच बक्कळ कमाई केली आहे. एकीकडे चित्रपट रिलीज झाल्यानंतर कोटींचा टप्पा कधी पार होणार याची वाट पाहिली जात असताना बाहुबलीने मात्र प्रदर्शनाआधीच 350 कोटींची कमाई केली आहे. वितरण हक्कांमधून बाहुबलीने कोटींची कमाई करत चित्रपटाला अगोदरच सुपरहिट करुन टाकला आहे. 

 

कटप्पाने बाहुबलीला का मारले? या प्रश्नाचे उत्तर आपल्याला पुढील वर्षी मिळणार आहे. बाहुबली या बहुचर्चित चित्रपटाचा सिक्वेल येणार आहे.  'बाहुबली : द कन्लूजन' या नावाने हा चित्रपट असून २८ एप्रिल २०१७ ला प्रदर्शित होणार आहे. बाहुबली हा चित्रपट २०१४ मध्ये प्रदर्शित झाला होता. त्यावेळी ह्या चित्रपटाने बॉक्स ऑफिसवर धूमाकूळ घालत जोरदार कमाई केली होती. प्रदर्शनाच्या पहिल्याच दिवशी चित्रपटाने ५० कोटींचा गल्ला जमवला होता. 

 

अर्का मिडिया वर्क्‍सच्या बॅनरखाली 'बाहुबली -२' या चित्रपटाची निर्मिती होणार असून यामध्ये अभिनेता प्रभास, राणा डग्गुबाती, अनुष्का शेट्टी आणि तमन्ना भाटिया प्रमुख भुमिकेत आहेत. चित्रपटाचे दिग्दर्शन एस.एस.राजमौली करत आहेत.