'आई कुठे काय करते' मालिकेत मोठं वळण, अरुंधतीने अनिरुद्धसमोर दिली आशुतोषवरील प्रेमाची कबुली

Aai kuthe kay karte : अनिरुद्धसमोर अरुंधती आशुतोषवरील प्रेमाची कबुली देताना दिसते आहे. त्यामुळे आगामी भागात काय होणार याबद्दल सर्वांना उत्सुकता लागली आहे.

स्टार प्रवाह (Star Pravah) वाहिनीवरील 'आई कुठे काय करते' मालिका ( Aai kuthe kay karte ) सततच्या ट्वीस्टमुळे चर्चेत येत असते. मालिकेत नुकताच आशुतोषचा मोठा अपघात झालेला पाहायला मिळाला. यामुळे अरुंधती कोलमडून गेली आहे. तिला धीर देण्यासाठी अनिरुद्ध रुग्णालयात गेला आहे. याचवेळी नकळत का होईना पण अरुंधती आशुतोषवरील प्रेमाची कबुली अनिरुद्ध समोर देताना दिसली. त्यामुळे आगामी भागात काय होणार, याबद्दल जाणून घेण्यासाठी सर्वजण उत्सुक आहेत.

नुकत्याच समोर आलेल्या प्रोमोत पाहायला मिळाले की, आशुतोषचा अपघात झाला आणि त्याच्यावर रुग्णालयात उपचार सुरू आहेत. अरुंधती देखील रुग्णालयातच आहे. तिची देखील वाईट अवस्था आहे. अरुंधतीला अशा परिस्थितीत पहिल्यांदाच अनिरुद्ध धीर देताना दिसत आहे. मात्र अरुंधतीला आशुतोषवरील तिच्या प्रेमाची जाणीव झाली आहे आणि त्याबद्दल ती अनिरुद्धला सांगताना दिसते आहे. 

आशुतोषचा अपघात मोठा असल्यामुळे तो कोमात जाऊ शकतो, अशी शक्यता डॉक्टरांनी सांगितली आहे. त्यामुळे आशुतोष शुद्धीवर कधी येणार याकडे सर्वांचे लक्ष लागले आहे. शुद्धीवर आल्यावर अरुंधती तिच्या मनातील भावना त्याच्यासमोर व्यक्त करणार का, याबद्दल देखील सर्वांच्या मनात उत्सुकता आहे. आता मालिकेत पुन्हा कोणते नवीन वळण येणार? आशुतोषचे काय होणार? हे पाहणे कमालीचे ठरणार आहे.