WHAT!! ‘बिग बॉस मराठी 4’ला होस्ट मिळेना? ‘या’ दिग्गज अभिनेत्यानेही दिला नकार??

Bigg Boss Marathi 4 : होय, महेश मांजरेकर ‘बिग बॉस मराठी 4’ होस्ट करणार नसतील तर या नव्या सीझनचा नवा होस्ट कोण असणार? हा प्रश्न अद्यापही अनुत्तरीत आहे.

बिग बॉस हिंदीच्या धर्तीवर ‘बिग बॉस मराठी’ हा शो आला आणि आला तसा गाजला. आत्तापर्यंतच्या शोच्या तिन्ही सीझनला प्रेक्षकांचा जबरदस्त प्रतिसाद मिळाला. बिग बॉसच्या घरातील सेलिब्रिटींची भांडण, त्यांच्यातील रूसवे-फुगवे, हळूच फुलणारं प्रेम आणि रोज नव्या टास्कनी प्रेक्षकांचं भरपूर मनोरंजन केलं. आता ‘बिग बॉस मराठी’चा चौथा सीझन (Bigg Boss Marathi 4 ) प्रेक्षकांच्या भेटीस येतोय. नुकताच ‘बिग बॉस मराठी 4’चा टीझर रिलीज झाला. पण चर्चा खरी मानाल तर होस्टमुळे शोचं घोडं अडलं आहे. होय, ‘बिग बॉस मराठी 4’ला होस्टच मिळत नसल्याचं कळतंय.

‘बिग बॉस मराठी’चे आत्तापर्यंतचे तिन्ही सीझन महेश मांजरेकर (Mahesh Manjrekar ) यांनी होस्ट केलेत. त्यांनी प्रत्येक सीझन अक्षरश: गाजवलं. प्रेक्षकांनाही त्यांचं सूत्रसंचालन जाम आवडलं. पण ‘बिग बॉस मराठी 4’ महेश मांजरेकर होस्ट करणार नसल्याची चर्चा आहे. महेश मांजरेकर सध्या अनेक चित्रपटांच्या प्रमोशनमध्ये व्यस्त आहेत. यासोबतच ते काही बॉलिवूड चित्रपटांमध्येही काम करत आहे, त्यामुळे त्यांना वेळ देणं शक्य नसल्याचं सांगण्यात येत आहे. अद्याप महेश मांजरेकर यावर काहीही बोललेले नाहीत. पण मांजरेकर हा नवा सीझन होस्ट करणार नसतील तर या नव्या सीझनचा नवा होस्ट कोण असणार? हा प्रश्न अद्यापही अनुत्तरीत आहे.

नाना पाटेकर यांनीही दिला नकार?
महेश मांजरेकर यांनी नकार दिल्यानंतर वाहिनीने नव्या होस्टचा शोध चालवला आहे. चर्चा खरी मानाल तर चॅनलने यासाठी अभिनेते नाना पाटेकर (Nana Patekar) यांच्याशी संपर्क साधला. पण नानांनी हा कार्यक्रम होस्ट करण्यासही नकार दिला आहे.

या नावाची जोरदार चर्चा?
एकीकडे वाहिनीकडून शो होस्ट करण्यासाठी मराठीतील काही मोठ्या नावांशी संपर्क साधला जात आहे. अशात एका नावाची जोरदार चर्चा आहे. हे नाव म्हणजे अभिनेता सिद्धार्थ जाधव. होय, तूर्तास तरी ‘बिग बॉस मराठी 4’ सिद्धार्थ जाधव होस्ट करणार, अशी चर्चा जोरात आहे. मराठमोळा स्टार अंकूश चौधरी याच्या नावाचीही चर्चा आहे. आता खरं काय ते लवकरच कळेलच.