'बिग बॉस मराठी' फेम अभिनेत्रीने गोव्यात खरेदी केलं आलिशान घर; फोटोंद्वारे दाखवली झलक 

'बिग बॉस मराठी' फेम अभिनेत्रीने घेतलं नवं घर! शेअर केले फोटो

Meenal Shah: 'बिग बॉस मराठी'च्या तिसऱ्या पर्वात सहभागी होऊन मिनल शाहने (Meenal Shah)  प्रचंड लोकप्रियता मिळवली. मिनलने 'बिग बॉस'च्या घरात एंट्री घेतल्यापासून ती नेहमीच काही ना काही कारणांमुळे चर्चेत असायची. या पर्वातील टॉप ५ स्पर्धकांमध्ये मिनलने स्थान मिळवलं होतं. शिवाय ‘एमटीव्ही रोडीज’ या रिअ‍ॅलिटी शोमध्येही ती झळकली होती. दरम्यान, मिनल शाह सोशल मीडियावर कमालीची सक्रिय असते. त्याद्वारे ती चाहत्यांच्या संपर्कात राहण्याचा प्रयत्न करते. अशातच नुकतीच मिनलने सोशल मीडियावर एक पोस्ट शेअर केली आहे. या पोस्टच्या माध्यमातून तिने चाहत्यांसोबत आनंदाची बातमी शेअर केल्याचं पाहायला मिळतंय.

मिनल शाहने दिवाळीच्या शुभमुहूर्तावर गोव्यामध्ये नवीन घर खरेदी केलं आहे. आपल्या नव्या घरात गृहप्रवेश करतानाचे फोटो तिने सोशल मीडियावर शेअर केले आहेत.

इन्स्टाग्रामवर मिनलने तिच्य नव्या घराचे फोटो पोस्ट केले आहेत. ही पोस्ट शेअर करताना मिनलने त्याला भलंमोठं कॅप्शन देत त्यामध्ये लिहलंय, "गणपती बाप्पा मोरया! त्याची सुरुवात काही वर्षांपूर्वी झाली, जेव्हा आम्ही आमच्या स्वप्नातलं घर बनवायचं ठरवलं, त्यावेळी आम्ही फक्त ठरवलं होतं आणि तेव्हा प्रत्येकजण प्रचंड उत्साहित होता. हो, पण ते वाटतंय इतकं सोपं नव्हतं, परंतु आता जेव्हा आम्ही मागे वळून पाहतो तेव्हा त्याची किंमत कळतेय. जागेची उत्तम निवड ते आम्ही ज्या प्रकारे कल्पना केली त्याप्रमाणे संपूर्ण घर तयार करण्यापर्यंत, ते रोलरकोस्टर राईडसारखं होतं. शेवटी आमचं स्वप्न सत्यात उतरलं". 

पुढे मिनलने लिहलंय, "धनत्रयोदशीच्या शुभ मुहूर्तावर आम्ही गोव्यातील नव्या घरात प्रवेश केला. अनेक वर्षांच्या अथक परिश्रमानंतर, विश्राती न घेता आणि देवाच्या कृपेने आम्ही आमचे स्वप्न पूर्ण करू शकलो. मला स्वतःचा खूप अभिमान वाटत आहे. माझ्या कुटुंबीयांसमवेत मी गृहप्रवेश करत आहे. याबद्दल मी स्वत: ला खूप भाग्यवान समजते. “सपने देखने से लेकर उनको पूरा करने तक का सफर” शेअर करत आहे". असं लिहीत मिनलने चाहत्यांना गुड न्यूज दिली आहे.