अजय देवगण अन् 'भूल भूलैय्या ३'च्या दिग्दर्शकाचा १० वर्ष रखडलेला सिनेमा, 'नाम'ला अखेर मिळाली रिलीज डेट

अजय देवगणचा रखडलेला 'नाम' सिनेमा अखेर या तारखेला होणार रिलीज! 'भूल भूलैय्या ३'चे दिग्दर्शकांनी सांभाळलीय धुरा

सध्या बॉलिवूडमध्ये 'सिंघम अगेन' आणि 'भूल भूलैय्या ३' या सिनेमांची चांगलीच चर्चा आहे. दिवाळीच्या मुहुर्तावर रिलीज झालेले हे दोन्ही सिनेमे प्रेक्षकांच्या मनाचा ठाव घेण्यास यशस्वी झाले आहेत. 'सिंघम अगेन'मध्ये अजय देवगणनने पुन्हा एकदा बाजीराव सिंघमची प्रमुख भूमिका साकारलीय. तर 'भूल भूलैय्या ३'चे दिग्दर्शक आहेत अनीस बाझमी. विशेष गोष्ट अनीस बाझमींचा १० वर्ष रखडलेला 'नाम' हा सिनेमा अखेर थिएटरमध्ये रिलीज होणार आहे. या सिनेमात अजय देवगणने प्रमुख भूमिका साकारलीय. 

अजय देवगणच्या 'नाम'चा ट्रेलर रिलीज

अजय देवगणच्या आगामी 'नाम'चा ट्रेलर रिलीज  झालाय. हा ट्रेलर पाहून सिनेमा रहस्यमयी थ्रिलर आहे हे पाहायला मिळतंय. शहरात विविध ठिकाणी खून होतात. हे खून एकाच व्यक्तीने विविध रुपात केलेले असतात. हा व्यक्ती असतो अजय देवगण. पण हे खून त्यानेच केले असतात का? यामागच्या रहस्याचा कसा पर्दाफाश होतो? अशा घटनांचा उलगडा 'नाम' सिनेमा पाहूनच होईल. विशेष म्हणजे सध्या गाजत असलेल्या 'भूल भूलैय्या ३'चे दिग्दर्शक अनीस बाझमींनी या सिनेमाचं दिग्दर्शन केलंय. 

१० वर्ष रखडलेला नाम

अजय देवगणचा 'नाम' हा सिनेमा १० वर्ष रखडला होता. २०१४ साली शूटिंग करुन तयार झालेला 'नाम' सिनेमा आजवर रिलीज झालाच नव्हता. अखेर 'नाम'ला २०२४ मध्ये मुहुर्त मिळाला असून २२ नोव्हेंबरला हा सिनेमा प्रेक्षकांच्या भेटीला येणार आहे. या सिनेमात अजय देवगणसोबत विजय राज, समीरा रेड्डी, भूमिका चावला या कलाकारांच्या प्रमुख भूमिका आहेत. 'सिंघम अगेन' आणि 'भूल भूलैय्या ३' दोन्ही सिनेमे सुपरहिट झाल्याने 'नाम'ला कसं यश मिळणार याची सर्वांना उत्सुकता आहे.