WHAT? ‘Hera Pheri 3’साठी अक्षयने मागितले इतके कोटी? याच कारणानं झाली ‘छुट्टी’?

Hera Pheri 3 Akshay Kumar: ‘हेराफेरी 3’ची स्क्रिप्ट मला आवडली नव्हती, असं अक्षयने सांगितलं असलं तरी त्याने या चित्रपटामध्ये काम न करण्यामागचं कारण आता समोर आलं आहे...

मी ‘हेराफेरी 3’ मध्ये (Hera Pheri 3 ) नसणार, हे अक्षय कुमारने ( Akshay Kumar) स्पष्टपणे सांगितलंय. काही रचनात्मक मतभेदांमुळे या सिनेमाला आपण नकार दिल्याचं अक्षयने स्पष्ट केलंय. पण आता एक वेगळीच चर्चा कानावर येतेय. होय, ‘हेराफेरी 3’ची स्क्रिप्ट ज्या पद्धतीने लिहिली गेली होती, ती मला आवडली नव्हती, असं अक्षयने सांगितलं असलं तरी काही मीडिया रिपोर्टमध्ये वेगळाच दावा केला जात आहे.

चर्चा खरी मानाल तर ‘हेराफेरी 3’साठी अक्षयने म्हणे 90 कोटींची मागणी केली होती. मेकर्सने ही मागणी अमान्य केली. अक्षयच्या जागी ‘हेराफेरी 3’मध्ये कार्तिक आर्यनची वर्णी लागल्याचं समजतंय. अद्याप कार्तिक यावर काहीही बोललेला नाही. पण त्याच्याबद्दलही एक चर्चा आहे. होय, ‘हेराफेरी 3’साठी अक्षयने 90 कोटी मागितले, मात्र कार्तिक हाच सिनेमा 30 कोटी करायला तयार आहे. आता या चर्चेत किती तथ्य आहे, हे ठाऊक नाही. पण सध्या चर्चा जोरात आहे.

फिरोज नाडियाडवाला अक्षयवर नाराज!
‘हेराफेरी 3’चे निर्माते फिरोज नाडियाडवाला अक्षयवर नाराज असल्याचंही मानलं जात आहे. अक्षयने ज्यापद्धतीने मीडियासमोर त्यांना प्रेझंट केलं, ते पाहून फिरोज नाराज झाल्याचं कळतेय. इतकंच नाही तर या नाराजीपोटी त्यांनी अक्षयकडून आणखी दोन सिनेमे काढून घेतले. बॉलिवूड हंगामाने दिलेल्या वृत्तानुसार, ‘हेराफेरी 3’बद्दल अक्षय जे काही बोलला, त्यामुळे फिरोज नाराज झालेत. यानंतर त्यांनी वेलकम 3 आणि आवारा पागल दीवाना 2 या चित्रपटातून अक्षयला बाहेरचा रस्ता दाखवला.

अक्षय ‘हेराफेरी 3’च्या स्क्रिप्टबद्दल बोलला. यामुळे आपल्या सिनेमाच्या कमाईवर वाईट परिणाम हाऊ शकतो. अक्षयला हे  ठाऊक आहे,तरिही तो बोलला, ही गोष्ट फिरोज यांना आवडली नाही. त्यामुळेच त्यांनी वेलकम 3 आणि आवारा पागल दीवाना 2 या दोन्ही चित्रपटातून अक्षयचा पत्ता कट केला. अर्थात या दोन्ही चित्रपटाच्या स्क्रिप्टवर अद्याप काम सुरू आहे. त्यामुळे काहीही फायनल नाही. पण अक्षयला या सिनेमातून काढलंच तर त्याला कोण रिप्लेस करेल, याची चर्चा जोरात सुरू झाली आहे.