नेहाच्या बंडूकाकांना लागली लॉटरी; आलिया भट्टसोबत झळकणार बॉलिवूडपटात

Ajit kelkar: बंडू काका आता लवकरच बॉलिवूड चित्रपटामध्ये झळकणार आहेत. आलियाच्या आगामी डार्लिंग्ज या चित्रपटात ते काम करणार आहेत.

'माझी तुझी रेशीमगाठ' ही मालिका सध्या लोकप्रियतेच्या शिखरावर आहे. या मालिकेतील जवळपास प्रत्येक कलाकार प्रेक्षकांच्या घरातील एक सदस्य झाला आहे. त्यामुळे या कलाकारांवर, त्यांच्या अभिनयावर प्रेक्षक भरभरुन प्रेम करत आहेत. यामध्येच नेहाच्या वडिलांच्या जागी असलेल्या बंडू काकांना तर प्रेक्षकांना अक्षरश: डोक्यावर उचलून घेतलं आहे. त्यामुळेच त्यांच्या चाहत्यांसाठी एक आनंदाची बातमी आहे.

मालिकेत अभिनेता अजित केळकर(ajit kelkar)  यांनी बंडू काका ही भूमिका साकारली आहे. विशेष म्हणजे हेच बंडू काका आता लवकरच बॉलिवूड चित्रपटामध्ये झळकणार आहेत. आलियाच्या (Alia Bhatt) आगामी डार्लिंग्ज (Darlings) या चित्रपटात ते काम करणार असून नुकतीच या चित्रपटाच्या ट्रेलरमध्ये त्यांची झलक पाहायला मिळाली.

अलिकडेच या चित्रपटाचा धमाकेदार ट्रेलर प्रदर्शित झाला. या ट्रेलरमध्ये मराठी कलाविश्वातील काही कलाकार दिसून आले. यात अजित केळकर यांच्यासह संतोष जुवेकर, किरण करमरकर हे मराठी कलाकार झळकणार आहेत.

दरम्यान, या चित्रपटात बंडू काका नेमकी कोणती भूमिका साकारणार याकडे सगळ्यांचं लक्ष लागलं आहे. आलिया भट्टची मुख्य भूमिका असलेला हा चित्रपटात घरगुती हिंसाचारासारखा विषय भाष्य करणार आहे. हा नेटफ्लिक्सवर ५ ऑगस्ट रोजी प्रदर्शित होणार आहे.