स्टारकिड असूनही एकदम साधा राहतो आमिरचा लेक; रिक्षातून फिरतानाचा व्हिडिओ समोर, नेटकरी करत आहेत कौतुक

सुप्रसिद्ध अभिनेत्याचा मुलगा असलेला जुनैद रिक्षातून प्रवास करताना दिसला. जुनैदचा हा व्हिडिओ सोशल मीडियावर व्हायरल झाला आहे.

बॉलिवूडमध्ये स्टारकिड्सची कमी नाही. अनेक स्टारकिड सोशल मीडिया सेन्सेशन आहेत. स्टारकिड त्यांची फॅशन, स्टाइल , लॅविश लिविंग यासाठी ओळखले जातात. पण, सध्या मात्र एका स्टारकिडच्या साधेपणाची चर्चा होत आहे. आमिर खानचा लेक जुनैद खानवर सोशल मीडियातून कौतुकाचा वर्षाव होत आहे. 

वडील बॉलिवूडचे सुपरस्टार असूनही अगदी साध्या पद्धतीने जीवन जगणारा जुनैद खान चर्चेत आला आहे. नुकतंच जुनैदला स्पॉट करण्यात आलं. सुप्रसिद्ध अभिनेत्याचा मुलगा असलेला जुनैद रिक्षातून प्रवास करताना दिसला. जुनैदचा हा व्हिडिओ सोशल मीडियावर व्हायरल झाला आहे. विरल भय्यानी या इन्स्टाग्राम पेजवरुन हा व्हिडिओ शेअर करण्यात आला आहे. या व्हिडिओवर कमेंट करत नेटकऱ्यांनी त्याचं कौतुक केलं आहे. 

जुनैद लवकरच अभिनयात पदार्पण करणार आहे. 'महाराजा' या सिनेमातून तो पदार्पण करत आहे. हा सिनेमा ओटीटीवर प्रदर्शित होणार असून यात दाक्षिणात्य अभिनेत्री साई पल्लवी जुनैदबरोबर मुख्य भूमिकेत दिसणार आहे. या सिनेमाच्या शूटिंगदरम्यानचे काही फोटोही व्हायरल झाले होते.