‘बाहुबली’ फेम तमन्ना भाटिया लग्नासाठी तयार! विदेशी डॉक्टरला करतेय डेट!!

प्रियांका-निक तसेच रणवीर-दीपिका या लव्हबर्ड्सच्या लग्नाच्या चर्चांना जोर चढला असताना आता आणखी एक अभिनेत्रीही लवकरच लग्नबंधनात अडकणार, असे मानले जातेय.  ही अभिनेत्री आहे, ‘बाहुबली’ फेम तमन्ना भाटिया. होय, प्रियांकाप्रमाणे तमन्नाही एका विदेशीला डेट करतेय. होय, एका अमेरिकन डॉक्टर फिजिशियनला तमन्ना डेट करतेय. याच डॉक्टरशी लग्न करण्याचा निर्णयही तमन्नाने घेतला आहे. सूत्रांनी दिलेल्या माहितीनुसार, पुढील वर्षी लग्न करण्याची तिची योजना आहे. खुद्द तमन्नाच्या आईने याबाबतचे संकेत दिले आहेत.
तमन्नाची आई रजनी भाटिया यांनी अलीकडे एका मुलाखतीत याचा खुलासा केला. तमन्नाचा ‘होणारा’ तिच्यावर प्रचंड प्रेम करतो, असे रजनी भाटिया बोलण्याच्या ओघात बोलून गेल्यात. अर्थात तमन्ना अद्याप यावर काहीही बोलली नाही. पण यातून चाहत्यांना मिळायची ती बातमी मात्र मिळाली.
तमन्नाचे नाव यापूर्वी अनेकांशी जुळले आहे. पाकिस्तानी क्रिकेटर अब्दुल रज्जाक आणि भारतीय क्रिकेट संघाचा कर्णधार विराट कोहली याच्यासोबत तमन्नाच्या अफेअरच्या चर्चा उठल्या. अर्थात या सगळ्या अफवा निघाल्या. पण आता तमन्नाच्या आयुष्यात एक व्यक्ति आहे आणि ती व्यक्ति तमन्नावर मनापासून प्रेम करते, हे मात्र खरे आहे. त्यामुळे लवकरच आपण तमन्नाला वधूच्या पोशाखात बघू शकणार आहोत.

तमन्नाने वयाच्या १५ व्या वर्षी आपल्या करिअरची सुरूवात केली होती. ‘चांद सा रोशन चेहरा’ या हिंदी चित्रपटातून तिने अ‍ॅक्टिंग डेब्यू केला होता.अर्थात तमन्नाचा हा चित्रपट दणकून आपटला होता. यानंतर तमन्ना काही व्हिडिओ अल्बममध्ये दिसली आणि नंतर तेलगू व तामिळ चित्रपटांकडे वळली. २००५ मध्ये तिने ‘श्री’ या चित्रपटात काम केले. यानंतर एकापाठोपाठ एक तामिळ चित्रपटांनंतर तिने कधीच मागे वळून पाहिले नाही. आज तमन्ना साऊथची एक मोठी स्टार म्हणून ओळखली जाते.