अभिमानास्पद! बॉलिवूड अभिनेता सोनू सूद बनला थायलंड टुरिझमचा ब्रॅंड अ‍ॅम्बेसेडर; पोस्टद्वारे दिली माहिती

अभिनेता सोनू सूदने सोशल मीडियावर नुकतीच एक पोस्ट शेअर केली आहे.

Sonu Sood : गरजवंतांच्या मदतीसाठी अभिनेता सोनू सूद नेहमीच धावून जातो. आपल्या देशवासियांच्या मदतीसाठी तो कायमच पुढे असतो. कोरोना काळात अभिनेत्याने लाखो लोकांना मदत केली. चाहत्यांमध्ये अभिनेता त्याच्या दिलदारपणासाठी ओळखला जातो. अशातच सोनू सूदचा (Sonu Sood) त्याच्या या योगदानाबद्दल सन्मान करण्यात आला आहे. थायलंड सरकारने अभिनेत्याला 'थायलंड टुरिझमचा 'ब्रॅंड अ‍ॅम्बेसेडर' बनवला आहे. थायलंड पर्यटन मंत्रालयाने अभिनेत्यावर विशेष जबाबदारी सोपविली आहे. 

सोशल मीडियावर अभिनेत्याने एक पोस्ट शेअर करत चाहत्यांना याबद्दल माहिती दिली आहे. आपल्या अधिकृत इन्स्टाग्राम अकाउंटवर वर्तमानपत्रातील कात्रणाचा फोटो त्याने शेअर केला आहे. या फोटोच्या कॅप्शनमध्ये अभिनेत्याने लिहलंय, "थायलंड टुरिझमच्या ब्रॅंड अ‍ॅम्बेसेडर तसेच सल्लागार म्हणून माझी निवड केल्याबद्दल मी स्वत: ला भाग्यवान समजतो तसेच याचा नम्रपणे स्विकार करतो". शिवाय सोनू सूदने त्याच्या पहिल्या पदेशातवारीत तो कुटुंबीयांसोबत थायलंडमध्ये गेल्याचाही त्याने उल्लेख केला आहे. 

पुढे त्याने म्हटलंय, या देशातील रोमांचक ठिकाणे आणि समृद्ध सांस्कृतिक वारसा जपण्याची संधी मिळाल्याने मला आनंद होत आहे. तुमच्या सगळ्यांचं प्रेम आणि शुभेच्छांसाठी धन्यवाद!"

सोनू सूदच्या वर्कफ्रंटबद्दल सांगायचं झालं तर अभिनेता लवकरच 'फतेह' या हिंदी सिनेमाच्या माध्यमातून प्रेक्षकांच्या भेटीला येणार आहे. या चित्रपटात अभिनेत्री जॅकलिन फर्नांडीससोबत तो स्क्रीन शेअर करणार आहे.