विकी कौशलच्या 'छावा' ने पार केला ४०० कोटी आकडा; १५ दिवसांत किती कलेक्शन केलं? जाणून घ्या

'छावा' (Chhaava) सिनेमाने बॉक्स ऑफिसवर आपला दबदबा कायम ठेवला आहे.

Chhaava Box Office Collection Day 15: 'छावा' (Chhaava) सिनेमाने बॉक्स ऑफिसवर आपला दबदबा कायम ठेवला आहे. प्रदर्शनाच्या तारखेपासून चित्रपटाची यशस्वी घौडदौड सुरुच असल्याची पाहायला मिळते. लक्ष्मण उतेकर दिग्दर्शित या चित्रपटात अभिनेता विकी कौशलने  (vicky kaushal)साकारलेली छत्रपती संभाजी महाराजांची भूमिका प्रेक्षकांना भावली आहे. याशिवाय रश्मिका मंदानाचा अभिनयलासुद्धा सिनेरसिकांची दाद मिळते आहे. दरम्यान, १४ फेब्रुवारीला छावा जगभरात प्रदर्शित झाला त्यानंतर आता जवळपास दोन आठवड्यानंतरही चित्रपटाच्या कलेक्शनमध्ये मोठी वाढ झाली आहे. या चित्रपटाने १५ व्या दिवशी सुद्धा जबरदस्त कमाई केली आहे.

'छावा' हा चित्रपट प्रेक्षकांची मनं जिंकत आहे. चित्रपट पाहण्यासाठी अजूनही थिएटरमध्ये प्रेक्षक गर्दी करताना दिसत आहेत. परिणामी चित्रपटाच्या कलेक्शनमध्येही भरघोस वाढ होते आहे. सॅकनिल्कच्या रिपोर्टनुसार 'छावा' ने रिलीजच्या १४ व्या दिवशी १२ कोटींची कमाई केली आहे. यासह 'छावा'चे १४ दिवसांचे एकूण बॉक्स ऑफिस कलेक्शन आता ३९८.२५ कोटी रुपये इतकं झालं. त्यात आता १५ व्या दिवसाचं कलेक्शन समोर आलं आहे. या चित्रपटाने १५ व्या दिवशी १३.२५ कोटी रुपयांची कमाई केली आहे. त्यामुळे चित्रपटाचे भारतातील एकूण कलेक्शन ४१२.१५ कोटी रुपये झाले आहे. दरम्यान, ही आकडेवारी ही प्रारंभिक आहे, त्यामुळे यात बदल होण्याची शक्यता आहे.सिनेमाचं बजेट १३० कोटी आहे. २०२५ वर्षाची 'छावा'ने बॉलिवूडला दमदार सुरुवात करुन दिली आहे. शिवाय हा चित्रपट विकी कौशलच्या करिअरमधील सर्वाधिक कलेक्शन करणारा चित्रपट ठरला आहे.

'छावा' सिनेमात विकी कौशलसोबत रश्मिका मंदाना आणि अक्षय खन्ना मुख्य भूमिकेत आहेत. रश्मिकाने सिनेमात महाराणी येसूबाई भोसलेंची भूमिका साकारली आहे. तर अक्षय खन्ना औरंगजेबाच्या भूमिकेत आहे. लक्ष्मण उतेकर यांनी 'छावा' सिनेमाचं दिग्दर्शन केलं आहे. या सिनेमात मराठी कलाकारांचीही फौज आहे.