Don 3 : 'डॉन ३'मध्ये कोण साकारणार रणवीर सिंगच्या 'जंगली बिल्ली'ची भूमिका?, या अभिनेत्रींची नावं चर्चेत

Don 3 : कियारा अडवाणी 'डॉन ३' साईन करणार असल्याची चर्चा पूर्वी झाली होती. दरम्यान आता कियाराशिवाय आलिया भट आणि दीपिका पदुकोण यांचीही नावं या चित्रपटात मुख्य भूमिकेसाठी समोर येत आहेत.

फरहान अख्तर(Farhan Akhtar)ने 'डॉन ३' (Don 3) चित्रपटाचा टीझर रिलीज केला आहे. टीझरमध्ये 'डॉन'ची ओळख करून देण्यात आली आहे. यासोबतच त्याने 'डॉन'च्या सिक्वेलमध्ये शाहरुख खान(Shah Rukh Khan)च्या जागी रणवीर सिंगची भूमिका घेतल्याची पुष्टी केली आहे. त्याचवेळी अशीही बातमी येत आहे की, 'डॉन'च्या या फ्रेंचायझीत करीना कपूर किंवा प्रियांका चोप्रा देखील येऊ शकतात.

वास्तविक, कियारा अडवाणी डॉन ३ साइन करणार असल्याची चर्चा पूर्वी होती. पिंकविलाने दिलेल्या वृत्तानुसार, अभिनेत्री या चित्रपटात मुख्य भूमिकेत दिसू शकते. या प्रकरणी चित्रपट निर्मात्यांनी कियाराशी संपर्क साधला आहे. दुसरीकडे, डॉन ३ चा टीझर रिलीज झाला तेव्हा कियाराने ही पोस्ट लाईक केली आहे आणि अशा परिस्थितीत कियारा या चित्रपटाशी जोडले जाण्याचे संकेत मानले जात आहे.

दीपिका आणि आलियाचीसुद्धा लागू शकते वर्णी
कियारा व्यतिरिक्त आलिया भटचे नाव देखील समोर येत आहे. 'रॉकी आणि रानी की प्रेम कहानी'मधली आलिया आणि रणवीरची जोडी चांगलीच पसंतीस उतरली होती, त्यानंतर आलियाचे नाव चर्चेत आहे. त्याचबरोबर 'डॉन ३'साठी रणवीरची रिअल लाइफ पत्नी दीपिका पादुकोणचे नावही घेतले जात आहे. दुसरीकडे, अलीकडे कियारा एक्सेल एंटरटेनमेंटच्या ऑफिसमध्ये दिसली. 'डॉन ३'च्या संदर्भात अभिनेत्री ऑफिसमध्ये पोहोचल्याच्या वृत्ताला सूत्रांनी दुजोरा दिला आहे.

कियाराने दिला होकार?
सूत्रांनी दिलेल्या माहितीनुसार, फरहान अख्तरने कियाराला स्टोरी लाइन सांगितली होती, त्यानंतर कियाराने या चित्रपटासाठी होकार दिला आहे. इतकेच नाही तर, सूत्रांवर विश्वास ठेवला तर कियाराने नेहमीच रणवीर सिंगसोबत काम करण्याचे स्वप्न पाहिले होते आणि आता ते प्रत्यक्षात येण्यासाठी अभिनेत्री खूप उत्सुक आहे.