Gangubai Kathiawadi : ‘गंगूबाई काठियावाडी’च्या काही मिनिटाच्या रोलसाठी अजय देवगणने किती फी घेतली माहितीये?

संजय लीला भन्साळींचा ‘गंगूबाई काठियावाडी’ (Gangubai Kathiawadi ) हा सिनेमा आज रिलीज झाला. या सिनेमासाठी आलियानं किती मानधन घेतलं, याचाही खुलासा झाला आहे. जाणून घ्या, बाकीच्या कलाकारांनी किती मानधन घेतलं...

संजय लीला भन्साळींचा ‘गंगूबाई काठियावाडी’ (Gangubai Kathiawadi ) हा सिनेमा आज रिलीज झाला. बॉलिवूडची चुलबुली गर्ल आलिया भट (Alia Bhat) या चित्रपटात मुख्य भूमिकेत आहे. त्यामुळे साहजिकच, आलियाचा हा सिनेमा काय कमाल करतो, याकडे सर्वांचं लक्ष लागलं आहे. आलियाशिवाय अजय देवगण (Ajay Devgan), हुमा कुरेशी, शांतनु माहेश्वरी, विजय राज, सीमा पाहवा हेही यात मुख्य भूमिकेत आहेत. या कलाकारांनी चित्रपटासाठी किती फी घेतली हे तुम्हाला ठाऊक आहे का?

बॉलिवूड लाईफने दिलेल्या वृत्तानुसार, प्रत्येक कलाकाराने भन्साळींच्या या सिनेमासाठी लाखो-करोडोत फी वसूल केली आहे.
आलिया या चित्रपटाचा आत्मा आहे. अख्खा सिनेमात तिच्या पात्रावर बेतलेला आहे.  या चित्रपटात आलिया गंगूबाई काठियावाडीची भूमिका साकारताना दिसणार आहे. गंगूबाईची भूमिका साकारण्यासाठी आलियाने प्रचंड मेहनत घेतली. अगदी मुंबईतला रेड लाईट एरिया म्हणून ओळखल्या जाणाऱ्या कामठीपुऱ्यातील सेक्स वर्कर्ससोबतही तिनं वेळ घालवला आणि म्हणूनच चित्रपटासाठी तगडी फी देखील घेतली.

रिपोर्टनुसार, या सिनेमासाठी आलियाने अजय देवगणपेक्षाही जास्त मानधन घेतलं. होय, भन्साळींच्या या सिनेमासाठी तिने 20 कोटी रुपये फी घेतली. अजय देवगणची सिनेमात फार मोठी भूमिका नाही. तो कॅमिओ रोलमध्ये आहे. रहीम लालाची भूमिका तो साकारताना दिसणार आहे. पण या काही मिनिटांच्या रोलसाठी त्यानेही भरभक्कम फी वसूल घेतली. चर्चा खरी मानाल तर त्याने त्याच्या रोलसाठी 11 कोटी मानधन घेतलं.

अभिनेता विजय राजने या चित्रपटात रझियाबाईची भूमिका साकारली आहे. हे स्त्री पात्र साकारण्यासाठी त्याने 1.5 कोटी रुपये घेतल्याचं कळतं.

अभिनेत्री सीमा पाहवा यांनीही ‘गंगूबाई काठियावाडी’या सिनेमात महत्त्वपूर्ण भूमिका साकारली आहे. या भूमिकेसाठी त्यांनी 20 लाख रुपये मानधन घेतल्याचं कळतं.

भन्साळींच्या या सिनेमात टीव्हीचा एक लोकप्रिय चेहराही दिसणार आहे. शंतनू माहेश्वरी या चित्रपटाच्या निमित्तानं बॉलिवूडमध्ये पदार्पण करतोय. त्याने या सिनेमासाठी 50 लाख रुपये फी घेतल्याची चर्चा आहे. 

हुमा कुरेशी या चित्रपटात एका महत्त्वपूर्ण रोलमध्ये आहे. या स्पेशल अपीअरन्ससाठी तिने म्हणे दोन कोटी चार्ज केले आहेत.